9-февралдиз Махачкъалада РД-дин Гьукуматдин Председателдин замес­ти­тель Нариман Абдулмуталибован регьбервилик кваз цIи, Россиядин халкьарин садвилин йисан сергьят­ра­ аваз, тешкилиз кIанзавай лезгийрин­ халкьдин манийрин фестивалдиз-кон­курсдиз талукьарнавай совещание кьи­ле фена.

Фестиваль-конкурс тухунин теклиф ганвайди лезги халкьдин кьегьал руш Фируза Керимовадин мергьяматлувилин «Иман» фонд я. Мярекатдиз акъатзавай пулдин вири харжарни и фондуни вичин хивез къачунва. Фестиваль-конкурс кьиле тухунин везифа «Дагъустан» РГВК-дин лезги редакциядал ихтибарна.

Совещанидин кIвалахда Росреестр­дин­ РД-да авай Управленидин регьбер   А. Пирмегьамедова, РФ-дин журналист­рин союздин РД-да авай отделенидин председатель М. Ибрагьимова, «Дагъус­тан» РГВК-дин гендиректор К. Гьамзатовади, же­ми­ятдинни сиясатдин векил С. Гьамидова, РД-дин искусствойрин лайихлу деятелри – Къ. Ибрагьимовани Р. Бекерова, музыкадин муаллим М. Шагьмурадовади, «Институт медиа» АНО-дин регьбердин заместитель И. Эзберовади, телевиденидин журналист В. Батманова иштиракна.

Н. Абдулмуталибова къейд авурвал­,  Ф. Керимовади идалай виликни вири­ халкьдиз хейлин проектар кьилиз акъудиз куьмекар гана. И сеферда ада, халкьдин манийрин фестиваль-конкурс тешкилуналди, чи милли меденият вилик тухуник вичин пайни кутазва.

Совещанидал фестивалдин-кон­курс­дин макьсадар, номинацияр тайи­нарна, ана иштиракун патал гьисаба кьун герек тир шартIар, жюридиз талукь ва са жерге маса месэлаяр веревирдна.

Фестивалдикай-конкурсдикай гегьенш малуматар «Лезги газетдин» къведай нумрада чапда.

Чи  мухбир