«Лезги газетдин» редакцияди цIи, Дидед чIалан международный йикъан сергьятра аваз, лезги чIалай кьве олимпиада кьиле тухуда. Махачкъала ва Каспийск шегьеррин мектебра кIелзавай аялрин арада 21-февралдиз – республикадин Исамудин Ханбалаеван тIварцIихъ галай образованидин центрада, Дербентдин мектебра кIелзавай аялрин арада 22-февралдиз шегьердин СтIал Сулейманан тIварцIихъ галай 21-нумрадин юкьван мектебда тешкилда.

Олимпиадайра 6-синифра кIелзавай аялриз иштиракдай ихтияр ава. Гьар са иштиракчидив вич 6-синифдин сухта тирди тестикьарзавай мектебдин директордин къул алай справка хьун шартI я.

Вилик йисара хьиз, алай йисузни гъалибчияр патал 5 чка тайинарда. Абуруз дипломар, пулдин пишкешар ва ктабар гуда. Пулдин пишкешар гъалибчи аялрин муаллимривни вахкуда.

Къейд ийин хьи, алай йисуз кьве олимпиададизни акъатзавай пулдин харжар лезги халкьдин кьегьал руш Фируза Назимовна Керимовадин «Иман» фондуни чара авунва.

«Лезги газет»