Гьелелиг шадвал ийиз жедач

РФ-дин МИД-дин Кьил Сергей Лаврова къейднавай­вал, США-дин президент Дональд Трампа Европа ва Владимир Зеленский чкадал ацукьарна лугьуз, садани шадвилер авун герек туш.

Январдин эхирда ва февралдин эвел кьиле ОАЭ-да Москвадин, Киевдин, Вашингтондин векилрин иштираквал авай дестейрин арада агалай гуьруьшар кьиле фена. Анрал США-ди теклифнавай ислягьвилин пландиз талукь гьялиз тахьанвай месэлаяр веревирд­на. РФ-дин Президентдин пресс-секретарь Дмитрий Пескован гафаралди, рахунрин нубатдин раунд гьа и йикъара кьиле фида. Къецепатан уьлквейрин СМИ-ри тестикьарзавайвал, сифтедай США-ди теклифзавай пландик Донбассдин вири мулкар Москвадин гуьзчивилик кутун, анаг ва Крым Россиядин мулкар яз тестикьарун, Запорожьедин ва Херсондин областра физвай женгер кьве патани акъвазарун, ВСУ-дин кьадар кьве сеферда тIимиларун, Украинадиз къецепатан кьушунар ва яракьар ракъурунал къадагъа эцигун квай.

Вад кам

Европадин вилик-кьилик квайбуру ва дипломатри Украина 2027-йисуз Евросоюздик экечIун патал вад кам къачун герек тирди малумарна. Идакай «Politiko» чешмеди хабар ганва.

Сад лагьай камуниз «Украина гьазур хьун» лугьузва. Яни месэладин патахъай рахунар кьиле тухун патал официальнидаказ тушиз Киевдиз теклифар гун.

Кьвед лагьай кам Европадин кIватIалдик экечIунин регьят къайда арадал гъуникай ибарат я. Дипломатрин гафаралди, союздиз цIийи уьлквеяр кьабулдайла, Еврокомиссиядин кьил Урсула фон дер Ляйена са шумуд жуьредикай менфят къачун теклифнава.

Пуд лагьай кам, бязи чешмейри тестикьарзавайвал, Венгриядин премьер-министр Виктор Орбан вич алай къуллугъдилай элячIун вилив хуьнихъ галаз алакъалу я. Евросоюз гегьеншарунин гьар са мес­элада вирибуру рейсадвал къалурун истемишзава, В.Орбан лагьайтIа, Украина аниз кьабулуниз акси я. ЕС-дин бязи векилри Орбан нубатдин сечкийра кумукьуник ва адан чкадал хьун мумкин тир Петер Мадьяра Украинадин жигьетдай вичин фикир дегишар хъувуник умуд кутазва.

Эгер сечкийра Орбан гъалиб хьайитIа, чешмеди Евросоюздиз кьуд лагьай камунал элячIун теклифзава: Венгриядин премьер чIалал гъун   США-дин президент Дональд Трампавай тIалабун.

Кьвед ва пуд лагьай камар къачудай мумкинвал тахьайтIа, дипломатри къейдзавайвал, Евросоюз ­Венгриядиз талукь яз са бязи къадагъаяр тайинарунин месэла веревирд авун давамар хъувуниз мажбур жеда.

Япониядини куьмек гуда

США-дивай яракьар маса къачуна, абур Украинадиз ракъурунин жигьетдай НАТО-ди арадал гъанвай программадик Японияни экечIнава. «NHK» телеканалдин малумат «РИА Новости» чешмеди раижнава.

Къейдзавайвал, Токиоди радарар ва бронежилетар маса къачуда, яни лув гун тийидай затIар. Гьа са вахтунда Япониядин гьукуматдин генеральный секретарь М. Кихаради гайи жавабдай малум жезвайвал, яракьар маса къачунин патахъай гьелелиг икьрар кутIуннавач.

Украина патал Америкадин яракьар маса къачунин теклиф алатай йисан июлдиз НАТО-дин генсек М. Рюттединни США-дин президент Д.Трампан арада кьиле фейи гуьруьшдал веревирднай. И серенжемдик НАТО-дин саки 20 уьлкве, гьакIни и альянсдик квачир Австралия ва ЦIийи Зеландия экечIна.

Москвади РагъэкъечIдай патан уьлквеяр са шумуд­ра тагькимарнай хьи, Украинадиз яракьар ракъуруни са затIни дегишардач, акси яз, ихьтин гьерекатри къалмакъал яргъалди давам хьуниз таъсирда.

«Лезги газет»