Чи йикъара хайи чIалал акъатзавай газетрин, журналрин подписка артух хьуник пай кутазвай кьегьал рухвайрикай сад Дагъустандин Халкьдин Собранидин депутат Марат Алияров я. Эхиримжи са шумуд йисуз ада Кьиблепатан Дагъустанда саки 200 хизандиз вичин патай «Лезги газет» кхьизва.
Малум хьайивал, жумарт ватанэгьлиди аялар патал лезги чIалал акъатзавай «Кард» журналдизни, цIинин йисалай гатIунна, куьмекар гудайвал я. Идакай Марат Алиярова мукьвара журналдин редактор Владик Батмановахъ галаз кьиле фейи гуьруьшдал хабар гана.
Къейд ийин хьи, «Кард» журнал 1980-йисалай Дагъустандин 9 чIалал чапдай акъатзава. Ада республикадин мектебра кIелзавай вишералди аялар хайи чIалаз, эдебиятдиз, медениятдиз мукьва хьуниз таъсирзава.
«Журнал муаллимринни акьалтзавай несилрин арада машгьурбурукай сад я. Аялар патал хайи чIалал акъатзавай тек сад тир и журналдиз куьмек гун важиблу месэла я», — лагьана М. Алиярова.
Чи мухбир
