РикIел хкана

31-январдиз КцIара Ктабрин кIвале лезги милли медениятдин «Самур» меркезди, адан хел тир эдебиятдин «Марвар» кIватIалди, «Алам ТВ»-ди лезгийрин машгьур шаир, драматург, гьикаятчи, чи фольклор, тарих кIватIуник зурба пай кутур, «Шарвили» эпос кIватI хъувур чIехи ватанпересрикай сад тир Забит Ризванован 100 йисан юбилейдиз талукьарнавай мярекат кьиле тухвана. Ана тIвар кьунвай тешкилатрин  кьилевайбуру, чкадин шаирри, гьикаятчийри, Манкъулидин хуьруьн мектебдин муаллимри, аялри, КцIар райондин медениятдин маканда кIвалахзавайбуру, ша­ирдин мукьвабуру, лезги эдебиятдал рикI алай ватан­эгьлийри иштиракна.

Межлис «Алам» журналдин кьилин редактор, «Алам ТВ»-дин регьбер Камран Къурбаналиева кьиле тухвана. Полковник Шаир Рамалданова, инженер Натикъ Алиева, филология­дин илимрин кандидат, алим, шаир Гуьлбес Асланхановади, шаирар­ тир Вакъиф Муьшкуьрвиди, Эйваз Гуьлалиева, Эсмира Магьмудовади, Дарвин Велиханова, лезги шиират хуралай чидай Элшад Шалбузова,­ Расим Бакарова, Ктабрин кIвалин директор Гуьлтекин Панагьовади, рагьметлу шаирдин хуьруьнви Оруж Оружева, Забит Ризванован тIварцIихъ галай мектебдин директор Самая Тагъиевади, шаирдин руш Китабе Ризвановади, езне Рамиз Мемеева ва хейлин масабуру Забит Ризванован уьмуьрдин рекьикай, адан эсеррикай чпин фикирар лагьана, адахъ галаз алакъалу легьзеяр, шаирдин баркаллу крар рикIел хкана.

Мярекатдал кIелай Забит­ Ризванован шиирри, адан чIа­ла­риз кхьенвай  манийри ишти­ракчийрик руьгь кутуна. Манидарар тир Руслан Межмуллаева, Роза Гьажимурадовади, Адил Сафарова, Рафаел Гьажиева шаирдин шиирриз теснифнавай манийралди­ мярекатдиз атанвайбурун рикIера экв туна, тIвар-ван авай чIа­гъанчи Расим Бакарова, далдамрин устIар Теюб Мегьралиева, чангудал (Кореядин музалат) макьамар тамамарзавай Гьезрет Сафарова мярекатдал абур гъана.

Гуьлалийрин Эйваз