Телефон чуьнуьхна
27-январдиз Махачкъаладин Кирован райондин полициядин отделдиз 63 йисан яшда авай чкадин агьалидилай арза атана. Таксист яз кIвалахзавай арзачидин гафаралди, 15 агъзур манатдин къимет авай адан телефон малум тушир касди чуьнуьхна. Идакай МВД-дин пресс-къуллугъди хабар гузва.
Полициядин къуллугъчийри тадиз кьабулай серенжемрин нетижада Къизляр шегьердай тир 17 йисан яшда авай жегьил отделдиз хкана. Ада хиве кьурвал, таксида аваз фейидалай кьулухъ гьакъи нагъд тушир пулуналди гана лугьуз, водитель алцурариз кIан хьана.
Таксистдиз жегьилдиз вич алцурариз кIанзавайди чир хьана. И кар субутун патал ада телефондай банкунин приложение къалурна ва пул агакь тавунвайди малумарна. И макъамда пассажирди таксистдин гъилевай телефон яна, кьулухъ патан рак ахъайна, тадиз катна. Гьелбетда, агьил итимдивай жегьилдив агакьариз хьанач. Амма, тешвиш тахьана, рекье гьалтай касдивай телефон тIалабна, ада полициядиз зенгна.
Полициядин къуллугъчийри телефон къакъудунай шак физвай жегьил тайинарна, гуьгъуьнлай тумбадин кIаник эцигнавай телефонни жагъана. Чуьнуьхай телефон полициядин къуллугъчийри вахчуна ва иесидив вахкана.
31 ДТП
Дагъустандин МВД-дин Госавтоинспекцияди хабар гузвайвал, 26-январдилай 1-февралдалди Дагъустандин рекьера 31 авария хьана. Нетижада 6 кас кьена, 43-дал (абурукай 2 аялар я) жуьреба-жуьре хирер хьана.
Госавтоинспекциядин къуллугъчийри машинар гьалзавай ватанэгьлийриз, мугьманриз рекьера къайдайрал амал авуниз эвер гузва.
«Лезги газет»
