Алай йисан февралдин варз вири Дагъустан патал туькьуьл хабар гваз атана: Украинада кьиле физвай махсус серенжемда Россиядин Федерациядин Игит, бине СтIал Сулейманан райондин Сайтархуьряй тир Муслим Жавидович Муслимов телеф хьана. Адан 28 йис тир.
М.Ж. Муслимова 74-мотосрелковый бригадада къуллугъзавай. Махсус серенжем гатIунай сифте варцарилай ада Ватандин аслу туширвал хуьн патал женгера иштиракзавай. АкьалтIай викIегь, намуслу, вичел ихтибарзавай гьар са везифадив жавабдарвилелди эгечIзавай кьегьал тир.
2024-йисуз адан алакьунриз, дирибашвилиз вини дережада аваз къимет гана: М.Ж. Муслимов Россиядин Федерациядин Игитдин тIварцIиз лайихлу хьана. Къизилдин гъед адав РФ-дин оборонадин министр Андрей Белоусова вахканай.
Игитдин хизандиз, мукьва-кьилийриз и йикъара гзафбуру башсагълугъвал гузва. Абурун арада Дагъустандин Кьил Сергей Меликовни ава.
«За виликдай лагьайвал, зун Ватан хуьзвай гьар са аскердив хцив хьиз эгечIзава. Дагъустандин вири хизанрихъ галаз санал абурал дамахзава, абур гъалибвал гваз сагъ-саламатдиз кIвалериз хтун вилив хуьзва. Муслим заз хъсандиз чидай. АкьалтIай агъайна, дугъри ва лайихлу гада тир…
Дериндай хажалат чIугунивди, за адан хизанриз, вири мукьва-кьилийриз башсагълугъвал гузва. Ам чи рикIера гьамишалугъ яз амукьда…», — кхьена С. Меликова вичин телеграм-каналда.
«Лезги газетдин» редакциядин коллективдини, Муслим Муслимов телеф хьунихъ галаз алакъалу яз, адан хизандиз, мукьва-кьилийриз, дериндай хажалат чIугунивди, башсагълугъвал гузва.
«Лезги газет»
