Лезги халкьдин арадай кьегьал рухваяр гзаф акъатна. Чи йикъарани абурун кьадар тIимил туш. Эхиримжи вахтара и кар СВО-да иштиракзавай, хиве авай везифаяр намуслудаказ кьилиз акъудзавай цIудралди кьегьалри тестикьарзава. Абурукай яз, завай ери-бине Алидхуьрелай тир офицер Руслан Къурбанован тIвар кьаз жеда (шикилда).
Жумарт хва Руслан самбодай дуьньядин чемпион ва тренер Рамазан Ибрагьимович ва 50 йисалай виниз муаллимвиле кIвалах авур Минасат Назаралиевна Къурбановрин хизанда дидедиз хьана. Ада Кьасумхуьруьн 2-нумрадин юкьван школа ва Санкт-Петербургдин военный институт акьалтIарна. Адакай армияда ротадин командирдин заместитель, гуьгъуьнлай командир хьана.
Украинада махсус серенжем башламиш хьайи сифте кьилера Р. Къурбанов Донбассдиз фена, ана ватанпересвилин буржи кьилиз акъудзава.
2025-йисан 15-октябрдиз Россиядин Президентдин Указдин бинедаллаз Р. Къурбановаз «Жуьрэтлувиляй» орден гана.
Лагьана кIанда, им Русланаз ганвай сифтегьан шабагь туш. Ам гьакIни Суворован, Жукован, «Женгина тафаватлувиляй», 1 ва 2-дережайрин «Дирибашвиляй», «СВО-дин иштиракчи», «ЛНР азад авунай» ва маса медалрин сагьиб я.
Алай вахтунда офицер Р. Къурбанова гьужумдин дивизиядин командирдин везифаяр тамамарзава.
Гьужумдин дивизиядин командирдин гьар йикъан везифаяр муракаббур я. Нубатдалди душмандин сенгерар, даяхдин пунктар, дзотар терг авун ва виликди фин. Цава цIийи фашистрин дронрин лужари лув гузвай макъамра гьужумдиз фин, миллетбазрикай са-са километр чил азад авун регьят акъваззавайди туш. ЯтIани Къурбанова дивизиядин аскеррикай, офицеррикай гзаф хкатунар тежедай рекьер, уламар жагъурзава, душман катдай чкадал гъизва. Я катдай, я кIеви жедай чка амукь тавур миллетбазар есирдиз къачузва. Виридалайни кар алайди, дивизиядик квай кьушунри штабдай къвезвай тапшуругъар мукьуфдивди кьилиз акъудзава.
Аферин ва баркалла Руслан хьтин кьегьалриз ва ахьтин рухваяр тербияламишзавай вири диде-бубайриз!
Хазран Кьасумов
