Катзава
Сумский областда ВСУ-дин боевикар чеб алай чкайрилай тадиз катзава, гвай яракьар гадарзава. Идакай «РИА Новости» чешмеди хабар гузва.
Чешмедиз хабар ганвай суьгьбетчидин гафаралди, боевикар катай чкайрал ичкидин ичIи путулкаяр ва маса затIар алама.
И регионда чибурун «Кефер пад» дестеди женгер кьиле тухузва. Россиядин оборонадин министерстводин делилралди, суткадин муддатда мидяйрикай и мулкара саки 250 военный хкатна, гьакIни мягькемарнавай са машин, адетдин 14 машин, артиллериядин 2 яракь, материалрин 5 склад тергна.
Украинадай чи уьлкведин регионрал ахъайзавай беспилотникар тергунин карни гьар юкъуз кьиле физва. Оборонадин министерстводи хабар гузвайвал, 3-февралдин йифиз 10 БПЛА тергна: Белгороддин областда – 3, Орелдин областда – 3, Калугадин областда – 2, Курскдинни Ростовдин областра – гьарна сад.
Уьлкведин оборонадин министерстводин телеграм-каналда 2-февралдиз хабар ганвайвал, СВО тухунив эгечIайдалай инихъ Россиядин Яракьлу Къуватри Украинадин 670 самолет ва 283 вертолет, зенитный ракетайрин 649 комплекс, пилот галачиз лув гудай 111977 аппарат, 27445 танк ва дяведин маса машинар, РСЗО-дин 1657 машин, артиллериядин ва маса 33006 яракь, военный махсус 53475 автомашин тергна.
Рахунар давам жезва
Фронтда жезвай агалкьунриз килигна, Украинадин патахъай Абу-Дабида кьиле физвай рахунра Россияди вич къулайдаказ гьиссзава. Ихьтин фикир «РИА Новости» чешмедиз къецепатан сиясатдин месэлайрай туьркерин пешекар И. Санджакьа малумарна.
Ислендиз РФ-дин Президентдин пресс-секретарь Дмитрий Пескова РФ-дин, США-дин ва Украинадин векилрин арада рахунрин нубатдин раунд 4-5-февралдиз Абу-Дабида давам жеда лагьанай.
Къейд ийин, идалай вилик пуд терефдин арада рахунар 23-24-январдиз кьиле фенай. Россиядин Президентдин куьмекчи Юрий Ушакова ихтилат авурвал, ислягьвал арадал хкунин пландин важиблу паярикай сад Донбассдай Украинадин кьушунар ахкъудун я.
Евросоюздин гелеваз
Украинади Ирандин КСИР (Корпус стражей исламской революции) террориствилин тешкилат яз гьисаба кьун тестикьарнава. Идакай В. Зеленскийди вичин телеграм-каналда кхьенва.
Адан гафаралди, Киевди ихьтин кам Европадин союздин гуьгъуьналлаз къачуна. «Чна и тешкилат террориствилинди яз гьисабунин къарар кьабулна акьалтIарнавайди я, чна и месэла агалнава. Дуьньяда авай вири террористриз сад хьтин рафтарвилер къалурна кIанзава, абурукай садни гъалиб хьана кIандач», – кхьенва Евросоюздин гелеваз физвай Зеленскийди.
Ихтибар гуьнгуьна хтун патал
Ирандинни США-дин вилик-кьилик квай векилри 6-февралдиз ядерный месэлайрай рахунар гуьнгуьна хтунин ва гьалар къайдада тунин жигьетдай Туьркияда гуьруьш кьиле тухун мумкин я. Гуьруьшда Египетдин, Омандин, Катардин, Саудиядин Аравиядин ва ОАЭ-дин дипломатрини иштиракун гуьзетзава. Идакай «Лента.ру» чешмеди хабар гузва.
Алатай йисуз уьлквейрин арада кьиле фейи рахунар Израилдини США-ди Ирандин объектрал гьужум авурдалай кьулухъ кьатI хьанай. Ирандин МИД-дин кьилин гафаралди, алай вахтунда США-дихъ ихтибар ийиз жезвач, амма ихтибар гуьнгуьна хтунин алахъунар ийизва. Министрди алава хъувурвал, Иранни США арачийрин куьмекдалди алакъадал ала.
«Лезги газет»
