«СамурЭнерджи» АО-диз талукь идарайри Рутул районда «Орёл» тIвар алай гъвечIи гидроэлектростанция эцигдай ихтияр ганва. РД-дин Гьукуматдин телеграм-каналда хабар гузвайвал, алай йисан мартдин вацралай объект эцигиз гатIунда, цIийи ГЭС 2027-йисуз кардик акатда.
Къейд ийин хьи, ихтилат физвай объект Самурдин энергетикадин кластердин къурулушдик квай ГЭС-рикай сад я. И чIехи проектдин кьилин макьсад Кьиблепатан Дагъустан дурумлувилелди электричестводалди таъминаруникай ибарат я.
ЦIийи станциядин гужлувили 5,05 МВт тешкилда ва ада йисан къене тахминан 20 млн кВт/ч энергия гьасилда. Объект «ЭкоГЭС»-дин технологийралди эцигда, цин гьамбарханаяр арадал тагъана ва тIебиатдиз зиян тагана.
РД-дин энергетикадин ва тарифрин министерстводин пресс-къуллугъди хабар гузвайвал, Самурдин дереда ихьтин проектар кьилиз акъудунин нетижада республикадин кьиблепата авай муниципалитетар бес кьадарда электричестводалди таъминардай мумкинвал жеда.
Чи мухбир
