27-январдиз РД-дин Кьил Сергей Меликова республикада жегьилриз армиядиз эвер гунин месэлайрай комиссиядин заседание кьиле тухвана. РикIел хкин, 2026-йисалай гатIунна, призывдин комиссийри йисан кьиляй-кьилиз кIвалахда. Армияда къуллугъдай яшара авай жегьилар кьушунриз йиса кьве сеферда рекье твада: 1-апрелдилай 15-июлдалди ва 1-октябрдилай 31-декабрдалди.

«Армиядиз фидай яшара авайбур виликамаз ва вахтунда гьисабдиз къачуна кIанда. И кардилай санлай призывдин кампаниядин агалкьун аслу я», — лагьана С. Меликова, военный комиссаррихъ ва муниципалитетрин кьилерихъ элкъвена.

И жигьетдай кьиле тухузвай ва районринни шегьеррин призывдин комиссийрин кIвалахдикай гегьеншдиз республикадин военный комиссардин везифаяр вахтуналди тамамарзавай Гьуьсен Омаргьажиева суьгьбетна. Адан гафаралди, жегьилар гьисабдиз къачунин кIвалахдив гатIуннава, 12 агъзурдалай виниз ксар гьисабдиз къачудайвал я.

«ЛГ»