17-январдиз райцентрадин «Ватан хуьзвайбурун багъда» аскервилин присяга кьабулунин гурлу серенжемни кьиле тухвана. Чпин рахунра «Ахцегь район» МР-дин кьил Абдул-Керим Палчаева, Ахцегь погранотряддин командованидин векилри, присяга кьабулзавай аскеррин диде-бубайри жегьилриз хуш келимаяр лагьана.
«Гьуьрметлу жегьил аскерар, къенин йикъалай куьне Ватан хуьнин пак буржи ватанпересвилин баркаллу адетралди тафаватлу Ахцегь погранчастуна тамамарда. Къуй квехъ чандин мягькем сагъвал, дяведин техника-яракь, пешекарвилер чирунин карда агалкьунар хьурай! Дуьнья ислягь хьурай! Дяве цIи чи гъалибвилелди куьтягь хьана, жегьилар сагъ-саламатдиз, хуруйрал орденарни медалар алаз чпин хизанриз хтурай! Амин!»
140-нумрадин Ахцегь погранотряд (2350 в/ч-дин къуллугъ) РФ-дин ФПС-дин къарардалди 1996-йисан 17-январдиз арадал атана. Сифте вахтунда сергьятчияр еке четинвилерал расалмиш хьана. Дагълух хъуьтIуьн шартIара баябан чуьлда аскерар алачухрикни чилин къазмайра яшамиш жезвай. Ихьтин къулайсуз шартIара 1996-йисан 5-сентябрдилай РФ-дин сергьятчийри Азербайжан Республикадихъ галаз дагъларин кьаскьандилай гирвейрин кьве виш километрдилайни гзаф участок чпин гуьзчивилик кутуна. Разивилелди къейдин, алай макъамда сергьятчийриз Ахцегьа, гьакI кьакьан заставайрални кваз яшайишдин вири къулайвилер авай имаратар эцигнава. Аскерар лап хъсан яракьралди, сергьятни девирдин истемишунрив кьур тадаракралди таъмин я.
Дашдемир Шерифалиев
