Дагъустан Республикадин Кьил Сергей Меликова 27-январдиз тешкиллувилин комитетдин заседание кьиле тухвана. Анал регионда Гъалибвилин 80 йис тамам хьунин сувар кьиле тухвайвилин нетижаяр кьуна ва Россиядин халкьарин садвилин йис гьикI кьиле тухудатIа веревирдна. Мярекатда гьукумдин органрин регьберри, депутатри, жемиятдин, жегьилрин тешкилатрин векилри иштиракна.
РикIел хкин, уьлкведин Президентдин Указдалди гъилевай йис Россиядин халкьарин садвилинди яз малумарнава.
«Садвилин йисуз республикадин гележег пайгарди ва цуьк акъудзавайди хьун патал чна гьар сада вичин пай кутун герек я. Чна асирра кар алай месэлаяр саналди гьялна, сада-садан агалкьунрал шадвална. Сада-садаз гьуьрмет, гражданвилин ерийриз къуллугъ авун хьтин сад тир къиметлу ивирар республика вилик тухунин заминвал я. И карда Дагъустанди мад сеферда чешне къалурун лазим я», — лагьана Сергей Меликова.
Ада къейд авурвал, цIинин йисан кьилин макьсад жемият тупламишунин, агьалияр ватанпересвилин идеалралди сад авунин, ахлакьдинни марифатдин адетдин ивирар, гьакъисагъ зегьметдин бегьерар артухарунин кар алай дибар мягькемарун я.
«Чна руьгьдин, диндин ивиррикай лугьун, жемиятдиз хийирлу умуми кIвалахдал яшайишдин институтар, жемиятдин, жегьилрин, аялрин тешкилатар, ветеранрин объединенияр, милли культурадин автономияр, культурадин ва спортдин деятелар желб авун герек я», — лагьана региондин регьберди.
Гъалибвилин 80 йис тамам хьуниз ва Ватан хуьзвайбурун йисаз талукьарнавай суваррин мярекатра 400 агъзурдалай виниз дагъустанвийри иштиракна. Республикада чIехи 125 мярекат, волонтеррин 3 агъзур акция, гьа гьисабдай яз военно-спортивный къугъунар, фестивалар, концертар кьиле тухвана. Шаз тешкилай кьван мярекатрикай республикадин вице-премьер Муслим Телякавова гегьеншдиз суьгьбетна.
Алатай йисан 9-Майдиз Каспийск шегьерда Гъалибвилин 80 йисаз талукьарнавай парад кьиле фена. Ана 1500 касди иштиракна. И юкъуз дагъустанвияр Вирироссиядин «Рекьин тийир полк» гьерекатдик экечIна ва ана 75 агъзур касди иштиракна. Региондин шегьерра ва районра «Гъалибвилин Пайдах» акция ва Каспийскдай Волгограддиз кьван автопробег кьиле фена.
РикIел хуьнин ва гъамлувилин юкъуз Махачкъала шегьерда Макаровадин тIварунихъ галай Женгинин баркаллувилин цIийиз туькIуьр хъувунвай музей ачухна. Гьа и юкъуз «РикIел хуьнин шем» ва «Дяведин цIун картинаяр» акциярни кьиле тухвана. Дагъустандин телевиденидай Ватандин ЧIехи дяведа дагъвийри къалурай игитвилерикай гьар юкъуз передачаяр гана. Яратмишдай ксари «Руьгьдиз къуватлубур» документальный фильм гьазурна.
Мярекатдал жемиятдин проектрин отделдин начальник Шамил Алиева алай вахтунда жегьилрин вилик акъвазнавай везифайрикай ихтилатна. Ада тапан хабаррин, видеойрин кьадарар гзаф жезвайди къейдна, жегьилрин арада гъавурдик кутунин, профилактикадин кIвалах артухарна кIанзавайдакай лагьана. И мураддалди «Уьлкведин гележег чи гъилера ава» ватанпересвилин проект туькIуьрнава. Адан сергьятра аваз, образованидин форумар, конференцияр, блогеррихъ, спортдин школайра кIелзавайбурухъ, абурун диде-бубайрихъ галаз гуьруьшар тешкилда, СВО-дин иштиракчийрин гъалибвилерикай малуматар гуда.
Республикада Россиядин халкьарин садвилин йис кьиле тухунин планрикай вице-премьер Муслим Телякавова малумат гана. Умуми программадик чирвилер гунин, ватанпересвилин, медениятдин ва спортдин проектар ква. Региондин шегьерра ва районра «Россия, заз вун кIанда: Россия чун я», «Чи Россия – чи Дагъустан», «Дагъустандин халкьарин чIалар чи ирс ва гележег я» форумар ва «Дагъвияр» фестиваль кьиле тухуда.
Кьилин фикир чи адетрин ивирриз гуда. «Хизандин кIвал», «Адетар хуьзвайбур», «Асиррин камаллувал Россиядин садвиле ава» фестивалар гзаф агьалийри иштиракзавайбур жеда.
Жегьилриз талукь мярекатарни пландик кутунва: «Гележег халкьарин дуствиле ава», «Равнение на флаг».
Мярекатдал Сергей Меликова Гъалибвилин юбилейдин суварин мярекатар тешкилуник, кьиле тухуник аквадай хьтин пай кутур хейлин дагъустанвийриз шабагьар гана.
Хийир Эмиров
