2025-йисуз Дагъустандин дагъларинни дерейрин мулкара цIийиз кутунвай багъларин майданар 4,5 сеферда артух ва тахминан 80 гектардиз барабар хьана. Идакай РД-дин хуьруьн майишатдин ва недай суьрсетдин министерстводин пресс-къуллугъди хабар гузва.
Къейдзавайвал, виридалайни еке пай и рекье Ахцегь районди кутунва — чна идалай виликни хабар гайивал, ана 52 гектардин чилел фад ва лап фад ирели жедай ва булдаказ бегьер гудай жуьредин багълар кутунва. РикIел хкин, майдин вацра ичерин макан тир Ахцегь районда, гьуьлуьн дережадилай 1000 метрдилай кьакьанда авай Россиядин мулкунал, сад лагьайди тир виниз тир бегьерлувилин (суперинтенсивный) багъ кутунай. Пландин бинедаллаз адан майдан 200 гектардив агакьдайвал гегьеншарда.
Министерстводи хабар гузвайвал, алатай йисуз цIийи багълар гьакIни Рутул (12,9 га), Ботлих (8 га) ва Гуниб (5 га) районра пайда хьана.
«Лезги газет»
