20-январдиз РАН-дин Дагъустандин ахтармишунрин федеральный центрадин ЦIадаса Гьамзатан тIварцIихъ галай чIалан, эдебиятдин ва искусстводин институтда лезги чIалан орфографиядин свод веревирд авун патал тешкилнавай махсус дестедин кьвед лагьай заседание кьиле фена.
РД-дин Гьукуматди арадал гъанвай орфографиядин комиссияди винидихъ тIвар кьунвай институтдин вилик Дагъустандин халкьарин чIаларин орфографиядин сводар веревирд авунин, цIийи хъувунин тапшуругъ эцигнава.
Лезги чIалан дестедин сад лагьай заседание алатай йисан 23-декабрдиз кьиле фенай ва анал иштиракчияр 1998-йисуз чапдай акъатай своддихъ галаз мукьувай таниш хьунин, гьарда вичин теклиф агакьурунин нетижадал атанай.
Сад лагьай заседание хьиз, нубатдин кьвед лагьай заседанини РД-дин Гьукуматдин Председателдин заместитель, филологиядин илимрин кандидат Нариман Абдулмуталибован регьбервилик кваз кьиле фена. ГьакIни ана са жерге пешекарри иштиракна: чIалан алим Саимат Юзбеговади, Дагъустандин халкьдин шаир, филологиядин илимрин доктор Фейзудин Нагъиева, «Лезги газетдин» кьилин редактор Мегьамед Ибрагьимова, филологиядин илимрин кандидат Халидин Эльдарова, «Лезги газетдин» кьилин редактордин заместитель Куругъли Ферзалиева, филологиядин илимрин кандидат Наида Султанмурадовади, РД-дин писателрин союздин лезги секциядин регьбер Максим Алимова, Тахо-Годидин тIварцIихъ галай ДНИИП-дин илимдин къуллугъчи Жаклина Мейлановади, «Дагъустандин дишегьли» журналдин редактор Наира Ибрагьимовади, ДИРО-дин муаллим Нагьима Таймуровади, ЦI. Гьамзатан тIварцIихъ галай ИЯЛИ-дин къуллугъчияр тир Латифа Рамазановади ва Сейфеддин Бедирханова.
Пешекарри куьрелди чпин фикирар ачухарна, виликан своддик кухтадай, аникай хкуд хъийидай чкаяр веревирдна. Заседанида иштиракдай мумкинвал тахьай бязибуру чпин фикирар электронный почтадин куьмекдалди агакьарна.
Эхирдай своддин гьар са параграфдиз талукь яз пешекаррин дестеди гудай теклифар кьилди-кьилди къалурунин, мад сеферда веревирдер хъувунин ва гуьгъуьнлай са нетижадал атунин къарар кьабулна. КIелзавайбурун гегьенш къатарив агакьун патал свод газетда чапдай фикирдал атана. Месэла гьялун патал 2-3 гьафтедилай мад сеферда кIватI хъжедайвал я.
Салим Салимов
