Чи миллетдин векилри гьи уьлкведин пайдах хкажайтIани, абуру сифте нубатда хайи ватан машгьурзава. Алатай йисан эхирра Белоруссия­дин Президент Александр Лукашенко­ди, физический культура ва спорт вилик тухуник пай кутунай виниз тир къимет гун яз, вичин ери-бине Кьасумхуьрелай тир машгьур спортсмен, грек­ринни римлуйрин жуьреда кьуршахар кьунай кьве сеферда дуьнья­дин чемпион Алим Селимовав Чух­са­гъулдин чар вахкана.

Чи ватанэгьлиди, грекринни римлуй­рин жуьреда дуьньядин чемпионвилин тIвар­цIиз лайихлу хьанвай сад лагьай дагъус­тан­види, дуьньядин кесерлу майданра къазанмишай агалкьунри неинки Дагъус­тандин, лезги халкьдин тIвар, гьакIни вичин кьвед лагьай ватан яз хкянавай Бело­руссиядин спортни кьакьан дережадиз хкажна. Спортда къазанмишай агалкьунар аниз бахш авун хьиз, ада физический культура вилик тухун ва милли къуватлу команда арадал гъун патални Белоруссиядиз яргъал йисарин гьакъи­сагъ зегьмет бахшнава. Алай вахтунда А. Селимова кьуршахар кьунай федерациядиз регьбервал гузва.

Рагнеда  Рамалданова