Алай вахтунда Дагъустандин МФЦ-дин идарайра агьалийривай электронный къул туькIуьриз жезва. Квалифицированный электронный къулуникай (КЭП) савдаяр ийидайла, гьахъ-гьисабдин документар вахкудайла менфят къачуз жеда. Ам госорганрихъ галаз онлайн къайдада кIвалахдайлани ишлемишзава. Малум тирвал, рекъемрин девирда электронный къул ишлемишзавайбурун кьадар югъ-къандавай артух жезва.
Кьилди къачуртIа, электронный къул са жерге ксариз герек жеда:
— 44 ва 223 лагьай нумрайрин федеральный законрин бинедаллаз затIар маса къачунин гьерекатра иштиракзавайбуруз — ЕИС-да (Единая информационная система в сфере закупок) регистрация авун патал, икьраррал къул чIугун патал, тулкIуна иштиракдайбур патал;
— тешкилатрин къуллугъчийриз — гьахъ-гьисабдин чарар вахкун патал, икьрарар патал;
— кьилдин ксариз — яргъа аваз документар тестикьардайла, Росреестрдихъ галаз кIвалахдайла, ИП ахъайдайла ва юзан тийидай объектрихъ галаз алакъалу икьрарар кутIундайла.
МФЦ-дин пешекарри чаз хабар гайивал, электронный къул туькIуьрун патал агьалийривай МАКС мессенджерда авай чат-ботдин куьмекдалди виликамаз нубат кьуналди ва я виликамаз нубат кьун тавуна, адетдин къайдада МФЦ-дин идарадиз фена, арза вугуз жеда. Жував хьана кIанзавай документар: паспорт, ИНН, СНИЛС. Госкъуллугърин порталда «Госключ» приложение телефонда тайинарун герек я.
Къейд ийин, виликдай электронный къул Дагъустандин анжах Махачкъала ва Каспийск шегьеррин МФЦ-дин идарайра туькIуьрзавай. Гила са шумуд шегьердин МФЦ-дин идарайра туькIуьриз жезва: Махачкъалада, Къизлярда, Каспийскда, Дербентда, Избербашда, Южно-Сухокумскда, Буйнакскда, Къизилюртда, Дагъустандин Огнида, Хасавюртда.
И къуллугъ гьавая кьилиз акъудзавайбурук акатзава.
Чи мухбир
