М. Дибирован тIварцIихъ галай Герейханован 2-нумрадин умуми образованидин школада кьиле фейи «2026-йисан муаллим» Вирироссиядин кон­курс­дин СтIал Сулейманан райондин муниципальный паюна Цмуррин юкьван школада урус чIалан ва литературадин тарсар гузвай муаллим Алагьвердиева Ракъужат Зейнудиновна гъалиб хьана. Дипломни адав муниципалитетдин Кьил Саид Темирханова шад гьалара вахкана.

Р.З. Алагьвердиева 1986-йисан 2-ап­релдиз Кьасумхуьрел чIехи ва гьуьрметлу хизанда дидедиз хьана. 2003-йисуз руша Кьасумхуьруьн 1-нумрадин юкьван школа вири тарсарай лап хъсан къиметар аваз акьалтIарна.

— За кIелдай йисара чи школада пешедал рикI алай, гзаф йисарин зегьмет­дин тежриба авай гзаф муаллимри кIва­лахзавай, — лугьузва Ракъужат Зейнудиновнади. — Абуру, иллаки урус чIаланни литературадин муаллимри, пешедин ус­тадар тир Селимова Саимат Мегьамедовнади, Магьмудова Агъабажи Нажмудиновнади зун муаллимвилел ашукьарна. Гьавиляй за школа акьалтIардайла кхьей сочиненидиз «Закай муаллим-филолог жеда» лагьана кьил гун дуьшуьшдин кар тушир.

Вичин рикIе авай мурад кьилиз акъу­дун патал Ракъужат 2003-йисуз Дагъус­тандин государстводин педагогвилин уни­верситетдин филологиядин факультетдик экечIна. Ана кIелдай йисарани чешнелу студентрин арада хьайи кьасумхуьруьнви руша университет «Филологическое образование» пешекарвиляй­ яру диплом къачуналди 2009-йисуз акьал­тIарна. Адаз филологиядин образованидин магистрдин дережа гана.

Р. Алагьвердиевади вичин зегьметдин­ рехъ 2010-йисуз Дагъустандин политех­нический колледждин Кьасумхуьруьн фи­лиалда урус чIалан муаллимвиле кIва­лахунилай башламишна. Инани Ра­къу­жат Зейнудиновнади вич чирвилер авай педагог, хъсан тешкилатчи яз къалурна.

2016-2017-йисара ада Цмуррин юкьван школада акьалтзавай жегьил несилдиз географиядин тарсар гана.

Чирвилер авай, кIвалах алакьдай пешекарар виринра герек я. ГьикI лагьайтIа, абурун кIвалахдилай гьар са коллективдин, карханадин  кIвалах вилик фин гзаф аслу я. И кар себеб яз, Ракъужат Зейнудиновнадиз 2017-йисуз районда цIийиз тешкилай «Информационное агентство» МБУ-диз корреспондентдин кIвалахал тек­лифна. Кьве йисан къене Р. Алагьвер­диевади вич гъавурда авай пешекар, кьетIен хатI авай корреспондент яз къалурна. Ам кIвалахдив эгечIзавай тегьерди информагентстводин руководство, кIвалахдин юлдашар гьейранардай.

2019-йисалай инихъ Р. Алагьвердиевади Цмуррин юкьван мектебда урус чIаланни литературадин тарсар гузва.

— Эхиримжи йисара Цмуррин школада образованидин цIийи ва кIвенкIвечи къайдаяр кардик кутунва, ана алай аямдин технологийрикай менфят къачузва, — лугьузва школадин директор Евгений Кузьминскийди. — И кар себеб яз школадиз кьетIен бажарагъдин пешекаррин-пе­дагогрин лазимвални хьана. Гьавиляй иниз неинки Кьиблепатан Дагъустандин районрай, гьакIни Россиядин маса субъектрайни чирвилер авай, аялрал ва муаллимвилин пешедал рикI алай, четинвилерихъай кичIе тушир педагогриз теклифна. Абурун арада Ракъужат Зейнудиновна хьтин муаллим хьунални чна разивал ва шадвал ийизва. Адан кIвалахдилай чун гзаф рази я.

Цмуррин инновациядин школада алай вахтунда 30 муаллимди кIвалахзава, 153 аялди кIелзава. КIелунин, ахлакьдин серенжемра, олимпиадайра, конкурсра ва марифатдин маса мярекатра иштиракунин рекьяй школа неинки районда, адалай яргъарани хъсанбурун жергеда ава. И агалкьунрик Ракъужат Алагьвердиевадин зегьметдин, алахъунрин еке пайни ква.

Ракъужат Зейнудиновнади 7-10-классра урус чIаланни литературадин тарсар гузва. И классрин аялри районда ва рес­публикада тухузвай олимпиадайра, конкурсра кIвенкIвечи чкаяр кьазва.

Кьилди къачуртIа, Ракъужат Зейнуди­новнади чирвилер гузвай Исламудин Уллугъаева «Чан алай классика» Вирироссиядин кIелдайбурун конкурсдин муниципальный паюна, Фируза Аминовади «ХъуьтIуьн мах», Марина Къурбановади «Вахт гьич алат тийидай», Хадижа Ягъибеговади «Михьи цин гьакъиндай къай­­гъударвал — гележегдин гьакъиндай къайгъударвал» лишандик кваз тухвай Вирироссиядин конкурсра, Динара Тагьировади, Милана Ражабовади ва масабуру райондин ва республикадин школьникрин олимпиадайра гъиле авай кIелунин йисуз урус чIалай 1, 2 ва 3-чкаяр кьуна.

Р. З. Алагьвердиевади Цмуррин СОШ-дин сайтдин редакторвилин везифаярни намуслудаказ кьилиз акъудзава. 2022-йисуз школадин сайтди «Образованидин идарадин виридалайни хьсан сайт» муниципальный конкурсда 1-чка кьуна.

Р.З. Алагьвердиевадихъ кIвалахда агал­­кьунрай, кIелзавайбур вирироссиядин ва республикадин олимпиадайриз, конкурсриз гьазурунай ганвай хейлин грамотаяр ава.

— За са вахтундани грамотайрихъ, лайихлу тIварарихъ ялайди туш, — лугьуз­ва Ракъужат Зейнудиновнади. — Зун патал виридалайни чIехи шабагь зи гъилик кIелзавай аялри къачузвай чирвилер, абурухъ жезвай агалкьунар я.

Чаз малум хьайивал, Р. Алагьвердиевадин кIвалахдилай школадин руководство, муаллимар хьиз, аялрин диде-бубаярни рази я.

РикI алай пешеди хьиз, Ракъужат муаллимдиз вичин гьуьрметлу хизандини­ руьгьдин таъминвал гузва. Уьмуьрдин юлдаш Сабир Шагьпазовичахъ галаз Ра­къужат Зейнудиновнади ферли кьве веледдиз тербия гузва. Абурун аялар тир Саида Кьасумхуьруьн 1-нумрадин юкьван школада 8-классда, Шагьпаза 6-классда лап хъсан къиметар аваз кIелзава. Абур кьведни отличникар, районда ва республикада тухузвай олимпиадайрин ва конкурсрин иштиракчияр я.

Вахъ ви рикI алай, гзаф четин, гьа са вахтунда виридалайни гьуьрметлу муаллимвилин кIвалахда мадни еке агалкьунар хьурай, гьуьрметлу Ракъужат Зейнудиновна!

Хазран  Кьасумов