ЦIийи йисан вилик, 24-декабрдиз, Ахцегь райондин Хуьруьгрин хуьре образованидин метлебдин важиблу серенжем кьиле фена. Хуьруьн мектебдин дараматда суварин къайдада 40 аялдиз чкаяр авай цIийи бахча ачухна. Икьван чIавалди лагьайтIа, «Кард» тIвар алай аялрин бахча мектебдин куьгьне дараматда авай. Рагьметлу Молла Мегьамеда гьеле 1907-йисуз вичин чилел хсуси харжийрихъ эцигай и дарамат дуьз 100 йисуз ишлемишна, лап хаталу гьалдиз атанвай. 2007-йисуз академик Э.З. Эмирбегован тIварунихъ галай школа кьве мертебадин типовой гуьзел цIийи дараматдиз хкана ва гьа йисуз райондин руководстводин ва гзаф кьадар мугьманрин иштираквални аваз адан 100 йисан юбилей къейднай. Куьгьнеди са бубат ремонт хъувурдалай кьулухъ, 2010-йисалай «Кард» тIвар алай аялрин бахчадиз элкъуьрна.
БицIекар патал талукь шартIар кими, къулайсуз дарамат ишлемишиз хьайи 18 йисан муддатда мадни пис ва хаталу гьалда авай. Фикир авурла, бицIекар патал цIийи бахча эцигдай хуьре я чил, я бюджетдин такьатар авачир. Ихьтин шартIара Ахцегь райондин руководстводи лап кутугай къарар кьабулна: аялрин бахча патав гвай цIийи школадин дараматдиз ахкъудна, кьве дестедин школа-садик тешкилна. И мураддалди сад лагьай мертеба капитальнидаказ ремонтна, бицIекар патал къулай вири шартIар яратмишнава: ксудай, къугъвадай, чирвилер гудай кIвалер, вижевай пищеблок, чими санузел, къецел къугъвадай махсус майдан ва икI мад.
— Аялар — жемиятдин цуьквер, чи экуь гележег я. Гьавиляй алакьдай вири хъсанвилер, дуьз тербия чна аялриз гузва. Алай вахтунда чна, хуьруьн школани аялрин бахча сад авуналди, хуьруьгви бицIекриз вилик фидай, чирвал къачудай тарифлу шартIар яратмишнава. Гележегда куьгьне школадин дараматдин чкадал типовой, кьилди аялрин бахча эцигда ва санлай хуьр мадни авадан ийида. Гьелбетда, вири и крарин кьилин мурад-метлеб жегьил хизанар хайи хуьре амукьун, школадани бахчада аялар артух хьун я, — лагьана райондин кьил Абдул-Керим Палчаева мярекатдал рахадайла.
Шадвилин мярекат Хуьруьгрин СОШ-да, Алла Жалиловадин тIварунихъ галай искусствойрин школада тербия къачузвай аялри ва райондин культурадин управленидин гьевескар артистри концерт гуналди куьтягь хьана.
Дашдемир Шерифалиев
