Алатай йисан декабрдин эхирра Махачкъалада, Дагъустандин профсоюзрин кIвале, Россиядин машгьур тележурналист, публицист, халис ватанперес Аликбер (Алик) Абдулгьамидован экуь къамат рикIера хуьниз талукьарнавай журналистрин кIвалахрин конкурсдин нетижаяр кьуна.
Аликбер Абдулгьамидовичан уьмуьрдикай, яратмишунрикай, пешекарвилин чIехи агалкьунрикай адан дуст, РД-дин профсоюзрин федерациядин председатель Абдула Мегьамедова гегьенш суьгьбет авуна. Журналистдин кIвалахдин юлдашрин, мукьва дустарин, адавай ДГУ-да пешекарвилин чирвилер къачур, чеб Алик Абдулгьамидован ученикар яз гьисабзавайбурун, государстводин, жемиятдин деятелрин рикIел хкунар гъалаба кутадайбур хьана. Абурун рикIин сидкьидай ийизвай рахунрай Аликбер Абдулгьамидов гьихьтин кьетIен, чешне къачуниз лайихлу къилихдин, чIехи бажарагъ авай, гьахълувал патал гъараз авачиз, эхирдал кьван фидай женгчи, вафалу дуст тиртIа ва Дагъустан гьихьтин багьа инсандикай, ватанпересдикай магьрум хьанатIа, аквазвай.
Москвада яшамиш жезвай алим-физик, МФТИ-дин преподаватель, Низами Абдулгьамидовича чIехи стхадин аял вахтар, итижлу вакъиаяр рикIел хкана ва адан тIварцIиз гьуьрмет авуна мярекатдиз атайбуруз сагърай лагьана.
Гьакъикъатдани, Аликбер Абдулгьамидова Россиядин лап хъсан журналистрин жергеда вичин лайихлу, вини дережадин чка кьазва. Дагъустандин журналистикада ада вичин тамам девир туькIуьрнава. Дагъустандин журналистрикай анжах са Алик Абдулгьамидовахъ, агъзурдалай гзаф инсанар залукда кьунвай террористрин юкьваз гьахьна, абурун башчи Салман Радуеваз суалар гудай жуьрэт хьанай. Вич вуж ятIа лагьана, журналистди адавай хабар кьунай: «Чун хъсан къуншияр я. Дагъустан гьакIани четин гьалда авайла, куьне чал вучиз гьужумна?» А чIавалай инихъ 30 йис алатнаватIани, гзафбурун рикIел алама, инсандин уьмуьр са куьнайни таквазвай, инсафсуз, яракьлу террористди микрофон гъиле авай журналистдин вилик вич гьахълу ийиз гьихьтин алахъунар авунайтIа. Къизлярдин ивияр экъичай вакъиайра террористри кьунвай аяларни дишегьлияр азад авун патал абурун чкадал Алик Абдулгьамидов вичин гуьгьуьлдалди залуквилиз фенай. Гуьгъуьнлай бомбайрик, кьве патайни ягъ-ягъунрик акатайла, аламатдин дуьшуьшдай хьиз ам къутармиш хьанай.
Игитвилиз барабар уьмуьр кечирмишай журналист, шейх Ярагъ Мегьамедан ватанэгьли, виниярагъви Алик Абдулгьамидован халкьдин патай тир шабагь — гьамиша вине ва михьи яз хвейи адан тIвар ва хъсан крар инсанрин рикIера амукьун я. Ам рикIел хуьниз талукьарнавай журналистрин пешекарвилин гьар йисан конкурсдини гьа и кардин патахъай шагьидвалзава. Шад жедай кар ам я хьи, сад лагьай конкурсда «Чапдин СМИ-яр» номинациядай «Лезги газетдин» хсуси мухбир, тIвар-ван авай журналист, публицист Абдулафис Исмаилов лайихлу хьана. Чна чи къелемдин юлдашдиз и гъалибвал мубаракзава ва адахъ мадни еке агалкьунар хьун алхишзава.
Конкурсдин жюриди виридалай хъсан макъала яз «Лезги газетдин» сайтда ганвай урус чIалал кхьенвай «Трагическая прелюдия к бессмертию» очерк гьисабна. Ам Кьасумхуьруьн лесхоздин тамухъан, кIириви Зейнудин Батманован уьмуьрдиз, игитвилиз бахшнавайди я. Авторди гуя лугьузва: журналист А. Абдулгьамидован вири уьмуьр гьамиша рикIера амукьдайди, игитвилиз барабарди хьана.
Чи мухбир
