Дагъустанвийрин игитвилерикай, жуьрэтлувилерикай неинки чи уьлкведа, гьакI дуьньядин майданрани кваз малум хьанва. Абуру Ватандиз вафалувилин, женгера викIегьвал, дирибашвал къалурунин, женгинин юлдашар кьиникьикай къутармишунин жигьетдай чешне къалурзава. Гьахьтин рухвайрикай сад СтIал Сулейманан райондин Зизикрин хуьруьнви Гьажибалаев Марат тир.
И кьегьалдикай заз дуьшуьшдай чир хьана. Зун КIварчагъ дереда авай хуьрерикай видеофильм гьазуриз фенвай. Зи яр-дуст, нуьцIуьгъви Тажибов Загьидина заз хуьрерикай итижлу суьгьбетар ийизвай. Зизикрин хуьре мугьманвиле авайла, зи фикир са сурун кьилихъ галай къванцел чIугунвай жегьил полковникдин шикилди вичел желбна. Тажибова ихтилат авурвал, Марат Гьажибалаев дяведин махсус серенжемда иштиракдайла телеф хьана.
Заз малум хьайивал, Гьажибалаев Марат Мугъулович 1977-йисуз Зизикрин хуьре дидедиз хьана. Юкьван школа куьтягьайвалди жаван Москвадин умуми частарин командирар гьазурдай училищедик экечIна. Жегьил лейтенант Дагъустан Республикадин Буйнакск шегьерда авай военный частуниз къуллугъиз рекье туна. Ватандиз къуллугъ авунив эгечIна са варзни алатнач, Чечен Республикада дяведин гьалар арадал атана. Зизиквини ина кьиле фейи женгера иштиракуниз мажбур хьана. Идалай гуьгъуьниз офицерди 1999-йисуз Дагъустандиз гьахьай яракьлу бандитрин дестеяр кукIварунин кардани иштиракна. Вичин везифайрив намуслувилелди эгечIзавай жегьилдиз 6 йисан къене майорвилин чин гана.
РикIе чIехи мурадар авай Гьажибалаев Россиядин Федерациядин Яракьлу Къуватрин умуми частарин академиядик экечIна ва 2008-йисуз анаг агалкьунралди куьтягьна. Гила ада къуллугъ Читадин областда мотострелковый отделенидин командир яз давамарна. Са вахт алатайла, жегьил офицер Сахалиндин островдал рекье туна. Гьажибалаева Кунаши островдани бригададин командирдин заместителвилин везифаяр кьилиз акъудна.
Алакьунар авай командирдал мадни жавабдарлу везифаяр ихтибарна. Адакай Чувудрин автономный округда авай частара мотострелковый бригададин командир хьана. Бригада ада лап хъсанбурун жергейризни акъудна. 2014-йисуз Гьажибалаев Украинадиз военный рекьяй советник яз рекье туна. Вичин хиве авай везифаяр ада Россиядин Федерациядин итижар хуьдайвал кьилиз акъудна. Сириядин Республикадиз куьмек гудай игьтияж арадал атайла, Россиядин кьушунрихъ галаз зизиквини Сириядиз фена. Ина ада са шумуд вацра къуллугъна.
2020-йисуз отставкадиз фенвай полковник Гьажибалаевавай Донбассдин чилер Украинадин миллетбазрикай азад хъувун патал гъиле кьур дяведин махсус серенжемда иштирак тавуна акъвазиз хьанач. Ам гуьгьуьллувилелди вичин офицервилин буржи кьилиз акъудиз фена. Ам бригададин командирвиле тайинарна. Я аялриз, я дишегьлийриз, я кьуьзуьбуруз инсаф тийизвай Украинадин фашистрихъ галаз кьиле тухузвай серенжем регьятди тушир. Гьар са женг къизгъиндаз элкъвезвай. Бригададин командирди вичин вилик эцигзавай тапшуругъар мукьуфдивди кьилиз акъудзавай. Гьайиф хьи, нубатдин женгина душмандин гуьлле адахъни галукьна. Ада, чи гзаф аскерри хьиз, Ватандин итижар, аслу туширвал патал чан гана.
Хуьруьнвийри викIегь полковник рикIелай алудзавач. Адан тIвар хуьруьн школадиз ганва.
Гьукуматдин патай Марат Мугъуловичаз ганвай шабагьарни тIимил туш. Ам «Жуьрэтлувиляй» кьве ордендин, «Къуллугъдин вахтунда тафаватлу хьунай» 1, 2, 3 лагьай дережайрин, «Кавказда жуьрэтлувилелди къуллугъ авунай» медалрин ва «Дагъустан Республикадин вилик лайихлувилерай» ордендин сагьиб я.
Марат Гьажибалаеван уьмуьрдин юлдаш хвани руш галаз Краснодар шегьерда яшамиш жезва, диде Гуьлпери Зизика ава.
Магьсуд Магьмудов,
отставкада авай полковник
