СтIал Сулейманан райондин ЦIийи Макьарин хуьруьн юкьвай физвай шегьредин къерехдал, банкетрин залдин патав рекье авай ва машинрал вил алаз акъвазнавай агьалияр марфарикай, гатун кузвай ракъи­нин нурарикай хуьн патал къулай кьур-оста­новка эцигна. Ам и хуьруьнви Магьмудов Мугьабудинан хизанди СВО-да игитвилелди вичин чан къурбанд авур хва Агьмед рикIел хуьнин лишан яз, хсуси харжидихъ эцигна.

Хуьруьнвийриз чизвайвал, Магьмудов­ Агьмед вини дережадин образование авай жегьил пешекар тир. Ам вичин хушуналди 2022-йисан октябрдин вацра дяведин махсус серенжемда иштиракиз фена. Кьве йисуз душмандихъ галаз женг чIугуна. 2024-йисан апрелдин вацра жегьилдин уьмуьр­дин рехъ фашистрин гуьлледи атIана. Кьегьал аскер хайи хуьруьн сурара секинарнава. Къени къилихрин жегьилдихъ мукьва-кьилийри, адан таяр-туьшери къени хажалат чIугвазва.

Кьур — остановка хъсандиз туькIуьрнава. Аскердин бубадиз хуьруьнвийри рикIин сидкьидай сагърай лугьузва. Магьмудов Мугьабудиназ мад са къени кар ийиз кIанзава. Адахъ хуьруьн юкьвал хкажнавай «Ясдавай диде» комплексдин патав булах туькIуьрдай фикир ава.

Халкь патал зегьмет чIугвазвай ихьтин рухваяр, чпин чанар гьайиф татана  Ватандин итижар хуьзвай гьар са кас гьамишалугъ чи рикIера амукьда.

Фатима  Къайибова,

11-классдин ученица