Дагъустан Республикадин Кьил Сергей Меликован тапшуругъдалди РД-дин Халкьдин Собранида РД-дин Кьилин векил Нуьсрет Омаров кьиле авай республикадин делегация Запорожьедин областдин Михайловкадин муниципальный округдиз фена.
Мугьманри Тракторный хуьре авай дагъустанвийри бинедилай ремонт авунвай культурадин кIвалин коллективдал кьил чIугуна. Медениятдин къуллугъчийриз Сергей Меликован патай телевизор багъишна.
Ахпа Дагъларин уьлкведай атанвайбур Михайловкадин спортзалдиз фена. Ана дагъви устIарри ремонтдин кIвалахар давамарзавай. УстIаррин кIвалахдихъ галаз таниш хьайидалай гуьгъуьниз Михайловкадин администрациядин дараматда чкадин регьберрихъ галаз Дагъустандин эцигунрин, архитектурадин ва ЖКХдин министерстводин векилрин ва ремонтдин кIвалахрал машгъул устIаррин гуьруьш кьиле фена.
Нуьсрет Омарова тафаватлу хьайи пешекаррив гьукуматдин шабагьар вахкана.
Дагъустандин делегация дяведин махсус серенжемда иштиракзавай РД-дин Халкьдин Собранидин депутат Расим Гьажиагъаевахъ галазни гуьруьшмиш хьана. Ада серенжемдив эгечIай сифте йикъалай Украинадин миллетбазрихъ галаз женг чIугвазва.
Делегацияди Михайловкадин округдин аялриз ва дяведин махсус серенжемда иштиракзавай Запорожьедин областда авай частариз ЦIийи йисан савкьатарни тухванвай. Абур вири лазим ксарив агакьарна.
* * *
Дяведин махсус серенжемда оборонадин министерстводин тапшуругъар кьилиз акъудзавайбуруз Дербент шегьердин агьалийри гузвай куьмекни гъвечIиди туш. Шегьердин администрациядин кьил Ханлар Пашабегован гафаралди, Запорожьедин, Донецкдин ва Харьковдин мулкара миллетбазрикай чи хуьрер, шегьерар азадзавайбуруз мергьяматлувилин 20 тонн парар рекье тунва.
Чи аскерриз куьмекдин шейэр кIватIзавай пункт шегьердин 14-нумрадин юкьван школада ава. И кардал машгъул ватанпересри Дагъустандай фенвай аскерриз сифте нубатда игьтияж авай шейэр кIватIзава. Абурукни генераторар, чими парталар, разведкада герек къвезвай алатар, квадрокоптерар, медикаментар, хайи чилин суьрсет акатзава.
СВО-диз гьазурзавай куьмекдик школьникри, колледжрин, вузрин студентри, образованидин, медицинадин, администрациядин ва маса тешкилатчийрин векилри, рухваяр махсус серенжемда телеф хьанвайбурун хизанри, карчийри чпин пай кутазва.
Чи мухбир
