Нетижайрикай раижзава
2025-йисан нетижайралди, Дагъустанда хуьруьн майишатдин суьрсет гьасилунин кьадар саки 2,5 процентдин гзаф хьанва. Идакай РД-дин хуьруьн майишатдин ва недай суьрсетдин министерстводин телеграм-каналди хабар гузва.
Виликамаз кьунвай делилралди, винидихъ къейд авур жуьредин суьрсет гьасилунин кьадар (пулунин гьисабдалди) 276 миллиард манатдилай артух хьанва. Им, 2024-йисан рекъемрив гекъигайла, 2,4 процентдин гзаф я.
Гьа са вахтунда, Дагъустандин Гьукуматдин телеграм-каналди раижзавайвал, 2025-йисуз хуьруьн майишатдин сезонрин вири кIвалахар тайинарнавай муддатра кьилиз акъуднава: зулун магьсулар 80,1 агъзур гектардай кIватI хъувунва, гатфарин магьсулар — 24,6 агъзур гектардай, салан майваяр — 38,1 агъзур гектардай, картуфар — 17,6 агъзур гектардай, емишар — 23,9 агъзур гектардай.
Чешмеди къейдзавайвал, 2025-йисан бегьер патал тумар цайи майданри санлай къачурла 351,3 агъзур гектар тешкилна. 10 вацран къене хуьруьн майишатдин ВП-дин (валовая продукция) кьадар 196,8 миллиард манатдив агакьна. Гьасилунин индекс лагьайтIа, 11 вацран къене 102,4 процентдикай ибарат хьана.
2026-йисан бегьер патал техилдин зулун тумар цадай майданрин кьадар 94 агъзур гектар жедайди фикирдиз къачунва. ГьакIни хабар гузвайвал, государстводин куьмек галаз (459 миллион манатдилай гзаф) мелиорациядин 52 проект кьилиз акъуддайвал я.
122 бицIек хьана
РД-дин здравоохраненидин министерстводин телеграм-каналди хабар гузвайвал, 2026-йисан 1-январдиз Дагъустанда 122 бицIек дуьньядал атана: 65 гадани 57 руш.
Идалай вилик РД-дин Гьукуматдин телеграм-каналди республикада 2025-йисан 7 вацра дуьньядал 24 730 аял атайдакай хабар ганай.
Чешмейрин къейдералди, эхиримжи йисара Дагъустанда дуьньядал къвезвай бицIекрин кьадар артух жезва. Мисал яз, 2025-йисан 7 вацра абурун кьадар, винидихъ къейднавайвал, 24 730 ятIа, 2024-йисан гьа и муддатда 24 506 аял дуьньядал атана.
Вилив хуьн тавур кьадар…
«Дагъустан патал газ» телеграм-каналдин делилралди, республикадин агьалийри хабар кьазвай суалрикай 15 процент газ ишлемишунай гузвай гьакъидихъ галаз алакъалубур я.
Чешмеди къейдзавайвал, абонентри виридалайни гзаф ихьтин кардин патахъай гъавурда тун тIалабзава: счетчик авайла ва газ гьар сеферда гьа са кьадар ишлемишзавайла, гьакъидин кьадар вучиз артух жезва?
Идарадин пешекарри ихьтин гьал арадал атунин кьилин себебрикай лагьана.
— Иесиди счетчикди газ ишлемишунин кьадар къалурзавай рекъемар идарадиз вахтунда рекье твазвач. Эгер газ ишлемишзавай касди гьар вацра 20-йикъалай 25-йикъалди ресурсдалди таъминарзавай идарадиз счетчикдин рекъемар рекье твазвачтIа, и дуьшуьшда сифтегьан пуд вацра газ ишлемишунай гьакъидин кьадар вацра ишлемишзавай газдин юкьван гьисаб фикирда кьуна тайинарда, кьуд лагьай вацралай — гьакъидин кьадар нормативдал асаслу яз акъудда.
— Квартирада счетчик эцигнава, амма иеси ана яшамиш жезвач. Гьатта кIвал ичIи яз хьайитIани, счетчикдин рекъемар гьар вацра ресурсдалди таъминарзавай тешкилатдив агакьарун герек я. Эгер икI тавуртIа, нормативдалди гьакъи гудай схема кардик акатда. Амма эгер яргъал вахтунда пата-къерехдиз фидай игьтияж арадал атайтIа, мисал яз, зур йисуз ва я йисан вахтунда, ихьтин дуьшуьшра чарасуз и кардикай ресурсдалди таъминарзавай тешкилатдиз хабар гана кIанда.
— Счетчик ишлемишун патал виже къведайди туш. Гьар са счетчикдин паспортда чарасуздаказ ам акъуднавай ва ам кардик жедай вахт къалурнава. И вахт акьалтI хьайила, прибор ахтармишна кIанда. И серенжем газ чара ийидай тешкилатри кьиле тухузва: прибор гележегда ишлемишун патал виже къведай гьалда авани, авачни пешекарри тайинарда.
Эгер паспортда къалурнавай муддатда счетчик ахтармиш тавуртIа, газ ишлемишунай гузвай гьакъидин кьадар нормативдин жуьреда къалурда…
Чешмеди къейдзавайвал, тамам делилар чирун ва я меслятар къачун патал телефондин 8 (800) 200 98 04 нумрадиз зенг ийиз жеда.
Гьазурайди — Муса Агьмедов
