13-январдиз Махачкъалада кьиле фейи совещанидал Сергей Меликова Каспийск шегьердин кьил Борис Гонцован кIвалахдилай вичин наразивал къалурна.
Кар ана ава хьи, ЦIийи йис алукьай сифте йикъарилай гатIунна шегьерда яшамиш жезвай агъзурралди агьалияр цикай магьрум хьана. «Хазар» тIвар алай насосрин станция кардикай хкатунин нетижада Каспийскдин агьалияр саки 10 юкъуз яд авачиз амукьна.
«Цихъ галаз алакъалу татугай гьалар гьеле ЦIийи йисан суварар алукьдалди арадал атана. Агьалийриз и гьаларикай, кьабулзавай серенжемрикай вахтунда хабар гун герек тир. Эгер месэла гьялиз четинзавайтIа, кьетIи серенжемар кьабулна кIандай — суварин къаршида агьалийрин пер хан тийидайвал ва абур куь кIвалахдилай нарази тежедайвал», — лагьана Дагъустандин Кьили Борис Гонцоваз.
Сергей Меликова гьакIни Каспийск шегьерда ЦIийи йисан сувар къейд авун патал кьиле тухвай мярекатрин гьакъиндайни вичин наразивал къалурна.
«Эгер за виридаз ЦIийи йис къейд авун патал тешкилай мярекатрай сагърай лугьузватIа, квез за и жигьетдай «кьвед» эцигзава», — алава хъувуна Сергей Меликова Каспийскдин мэрдихъ элкъвена.
Къейд ийин хьи, Каспийскда агьалияр яргъалди яд авачиз амукьунин гьакъиндай РФ-дин Силисдин комитетдин Дагъустанда авай Управлениди «Къайгъусузвал» статьядай уголовный дело къарагъарнава.
Агьмед Магьмудов
