Алатай йисан ноябрдин вацран эхирра кьиле фейи Сергей Меликован ачух эфирда къарагъарай месэлайрин са пай гьялнава. Идакай саласа юкъуз Махачкъалада кьиле фейи совещанидал Дагъустандин Халкьдин Собранида РД-дин Кьилин векил Нуьсрет Омарова хабар гана.
РикIел хкин, ачух эфир гатIундалди кьве гьафте амаз Сергей Меликован тIварцIел дагъустанвийрин патай 2400 арза атана, абурукай 244 Украинада кьиле физвай махсус серенжемдин иштиракчийрин ва абурун хизанрин патай тир. Виридалай пара арзаяр Махачкъаладай, ЦIунтIи райондай, Каспийск ва Дербент шегьеррай атанвай. Эфир кьиле физвай чIавуз 40 месэла веревирдна.
Н. Омарован гафаралди, 40 месэладикай 21 тамамдиз гьялнава, 14 суал гьялиз гъиле ава. Сергей Меликоваз арза авурбурукай сад Къарабудахкент райондин агьали А.Телеев тир. Ада республикадин Кьиливай вичиз набутрин коляска къачуз куьмек тIалабнавай. Месэла гьялнава — коляска адав РД-дин здравоохраненидин министрди агакьарна. Махачкъала шегьердин агьали Ирина Михайловская чкIидай гьалда авай кIвале яшамиш жез гзаф вахт тир. Ада и кардикай Дагъустандин Кьилиз хабар гана. С. Меликован тапшуругъдалди, адан кIвал бюджетдинбур тушир такьатрин гьисабдай цIийикIа туькIуьр хъувуна…
Гегьеншдиз РД-дин Кьилин сайтдай кIелиз жеда.
Чи мухбир
