Дагъустанди  информациядин технологийрин ре­кье кадрияр гьазурунин кIвалах къвердавай  гегьеншарзава: кIелунин  2025-2026-йис патал рес­публикадин вузра IT-пешекарвилерай бюджетдин чкайрин кьадар 2200-дал кьван гзафарнава. Идакай РД-дин образованидин ва илимдин министрдин заместитель Гьажимурад Мегьамедова РД-дин Гьукуматда кьиле фейи заседанидал хабар гана. Мярекат регион экономикадин рекьяй вилик тухунин карда тIебии тушир интеллектдин (ИИ) технологияр ишлемишунин месэлайриз талукьарнавай.

РД-дин образованидин ва илимдин министерстводин делилралди, республикада IT-пешекарар кьилин образованидин — 4 ва юкьван пешекарвилин образованидин 22 тешкилатди гьазурзава.

Жегьилрин арада и хилен  машгьурвал екеди­ я: 2025-2026-йисуз пешекарламишнавай образованидин тешкилатрик экечIун патал  конкурс са чкадал 5 касдиз барабар тир.

IT-пешекарвилерай вузра кIелзавай студент­рин  санлай къачур кьадар, 2025-йисан 1-ноябрдин делилралди, 7335 касдиз барабар я. Федеральный ва региондин дережайра  и рекьерай кьабулзавай студентрин кьадар къвердавай артухардай сиясат тухузва.

Саида Мурадова