5-декабрдиз СтIал Сулейманан райондин Курхуьруьн М. Рагьимован тIварунихъ галай 1-нумрадин мектебдин актовый залда юкьван виш йисарин лезги литературадин бажарагълу векилрикай сад, чIехи шаир, халкьдин викIегь хва Куьре Мелик дидедиз хьайидалай инихъ 685 йис тамам хьуниз талукьарнавай мярекат шад гьалара кьиле фена.
Ана райондин образованидин управленидин начальник Гьуьсейн Шихбабаева, Курхуьруьн администрациядин кьил Радик Гьажиалиева, мектебдин директор Мурсал Шихрагьимова, РД-дин культурадин лайихлу работник Таира Муспагьовади, Дагъустандин халкьдин шаир Сажидин Саидгьасанова, шаирар Гъулангерек Ибрагьимовади, Лейла Уружбеговади ва Зейнаб Султанагьмедовади, художник Мелик Агъабалаева, и цIарарин авторди, муаллимри, чIехи классра кIелзавай аялри, диде-бубайри ва масабуру иштиракна.
Мярекат ачухай Р. Гьажиалиева ам тешкилайбуруз, гьакIни паталай атанвай гьуьрметлу мугьманризни сагърай лагьана. Малум тирвал, Курхуьрел Куьре Меликаз бахшнавай мярекатар 1995-йисалай эгечIна тухузва. Виликдай Сажидин муаллимди шаирдин 670 йис тамам хьуниз талукьарна тухвай межлис зурбади хьанай, ам къени виридан рикIел алама.
Гь. Шихбабаева къейд авурвал, Куьре Меликахъ хайи чил хуьниз эверзавай, акьалтзавай несилдиз насигьат гузвай, чи руьгь хкажзавай эсерар гзаф ава.
Куьре Меликан уьмуьрдикайни яратмишунрикай Г. Межидовади чIехи доклад авуна. Мярекатдал Къ. Ибрагьимова Гъ. Ибрагьимовадин гафариз кхьенвай «Курхуьр» манидин презентацияни хьана. Мани устадвилелди Т. Муспагьовади тамамарна. Шаирдин яратмишунрикай чпин фикирар мадни С. Саидгьасанова, М. Агъабалаева, Л. Уружбеговади, Гъ. Ибрагьимовади, З. Султанагьмедовади, полковник М. Магьмудова ва и цIарарин авторди лагьана. Мектебдин аялри К. Меликан шиирар хуралай устаддаказ кIелна, манияр лагьана, сегьнеяр къалурна. М. Агъабалаева мектебдиз вичи чIугунвай Куьре Меликан суьретдин — чIехи, райондиз гъвечIи шикилар багъишна.
Мярекат гьазурайбур гьа и мектебдин лезги чIаланни литературадин кьилин дережадин муаллим, РФ-дин образованидин отличник Гуьзел Межидова, РД-дин халкьдин шаир Сажидин Саидгьасанов, лезги чIаланни литературадин муаллимар Мая Абдуразакьова, Авдина Набиева ва Анжелика Шихрагьимова я. Мярекат мектебдин 11-классда кIелзавай Тамила Сейбулаевади ва Азиз Агьмедова кьиле тухвана.
Къагьриман Ибрагьимов
