Дагъустан Республикадин Кьил Сергей Меликова 9-декабрдиз Россиядин Игитрихъ, ветеранрихъ, кадетрихъ, жаван кьегьалрихъ ва спортсменрихъ галаз гуьруьш кьиле тухвана. Шад мярекат Ватандин Игитрин йикъаз талукьарнавайди тир. Региондин регьберди кIватI хьанвайбуруз сувар тебрикна ва лагьана:
«Пак Георгийдин, Баркалладин орденрин кавалерри, Советрин Союздин, Россиядин Федерациядин Игитри — гьар девиррин, кьисметрин ва къилихрин инсанри — Ватан патал женгинин ва зегьметдин гъалибвилер къазанмишуналди, уьлкведин тарихда чпин тIварар туна. Жуьрэтлувилелди, чандилай гъил къачуналди чIехи тIварариз лайихлу хьайи и ксариз чна гьамиша гьуьрметзава».
Республикадин регьберди рикIел хкана хьи, Гъалибвилин юбилейдин 80 йис Ватан хвейибуруз, ветеранрин игит несилдиз бахшнавайди хьана.
«Россиядин офицерри, аскерри ва гуьгьуьллубуру хайи чил, гьахъвал, дуьзвал, Россиядин хатасузвал патал женг чIугун давамарзава. Чи уьлкведин сергьятар дикъетдивди хуьзва. Чи гзаф ватанэгьлийри 2026 лагьай ЦIийи йис хайи чкайривай яргъа, сенгеррал, къазмайра къаршиламишда. Алай вахтунда чи вири фикирар, хиялар гьабурукай я.
Зун инанмиш я, курантрин сесерик кваз чна вирида, сад хьиз, са кардикай — чи мукьвабур, танишар, ватанэгьлияр гъалибвал къазанмишна, сагъдиз кIвалериз хтуникай — фикирзава. Гьуьрметлубур, алукьзавай ЦIийи йисуз квехъ виридахъ чандин сагъвал, кIвалахда, уьмуьрда агалкьунар хьурай! Къуй 2026-йис чун патал ислягьди ва бахтлуди хьурай», — алава хъувуна ада.
Мярекатдин сергьятра аваз Сергей Меликова военный Артур Калаевав автомашиндин куьлегар вахкана. Ихьтин машинар «Ватан хуьзвайбур» фондунин патай женгера залан хирер хьайи ветеранриз гузва.
Машинар тамамвилелди герек вири шейэралди таъмин я.
Сергей Меликова женгера, зегьметда тафаватлу хьайи са жерге дагъустанвийрив шабагьар вахкана. Аскервилин буржи жуьрэтлувилелди ва кьегьалвилелди тамамарай Рагьим Нурмуханов «Жуьрэтлувиляй» ордендиз лайихлу хьана.
«Жуьрэтлувал къалурунай» медалдалди Къурбан Абдурагьманов, Марат Алиев, Шарабдин Алтавов, Эмиль Бабаев, Руслан Гьажиагьмедов, Алексей Кроченков, Евгений Мельников къейдна.
Телеф хьайидалай гуьгъуьниз Нариман Исаеваз гайи шабагь адан диде Абидат Исаевадив вахкана.
Мярекатдал Сергей Меликова Дагъустандин халкьарин арада дуствал мягькемаруник ва регион вилик тухуник чIехи пай кутур дагъустанвийрикайни вичин фикирар лагьана. Абурун арада профессор Гьамид Бучаевни авай.
«Адан аялвал дяведин ва дяведилай гуьгъуьнин лап четин йисарал ацалтна. Аялар гьа четин шартIара чIехи хьана, гзафбур етимриз элкъвена. Абурун рикIелай каш, мекьивал, чIехибурухъ галаз санал чIугур зегьмет алатнавач. Алатай вахтарикай куь рикIел хкунри, суьгьбетри къе жаванар ватанпересвилин руьгьдаллаз тербияламишунин карда куьмек гузва», — лагьана региондин Кьили Гьамид Бучаеваз.
Россиядин Игитар тир Дагъустандин ОМОН-дин командир хьайи полковник Загьид Загьидовакай ва ФСБ-дин полковник Мегьамед Гимбатовакай Сергей Меликова икI лагьана:
«Чун къе 1999-йисан августдин, сентябрдин вакъиаярни рикIел хкуниз мажбур жезва. Куь арада Россиядин Игитар Загьид Асмалович Загьидов ва Мегьамед Гимбатович Гимбатов аваз акун заз пара хуш я. Уьлкведин чIехи шабагьар къачудалди абур пара четин имтигьанрай экъечIна. Хаталувилик акатзавай уьмуьрдизни килиг тавуна, абуру руководстводи вилик эцигай везифаяр ян тагана кьилиз акъудна».
Дагъустандин регьберди лайихлу веледар тербияламишай женгерин иштиракчийрал, ветеранрал фикир желбна.
«Подполковник Эрзиман Муслимова Кеферпатан Кавказда, Сирияда ва Донбассда кьиле фейи женгерин гьерекатра викIегьвилелди иштиракна. Адан хва лейтенант Азим Муслимов СВО-да телеф хьана. Хтул Муслим Муслимовакай Россиядин Федерациядин Игит хьана. Ада, вичин телеф хьайи стхадилай кьисас вахчуналди, мидяяр тергзава».
Мярекатдин сергьятра аваз Сергей Меликова вириз аватай аял къутармишай Залму Индуховадикай, гъвечIи кьегьалар — стхаяр тир Нурмегьамедоврикай хуш келимаяр лагьана.
Гегьеншдиз РД-дин Кьилин сайтдай кIелиз жеда.
Хийир Эмиров
