2026-йисалай Ватандин ЧIехи дяведин ветеранар тир дагъустанвийриз гьар вацра 50 агъзур манатдин кьадарда аваз пулдин куьмек гуда. Идакай РД-дин Кьил Сергей Меликова вичин телеграм-каналда хабар гана.
Ватандин Игитрин юкъуз — 9-декабрдиз — Сергей Меликов Ватандин ЧIехи дяведин ветеран Муса Багьаудиноваз мугьман хьанвай. Пулдин куьмекдикайни сифте яз гьадаз хабар хьана.
«За Дагъустандин кьиле акъвазайла кьабулай сифтегьан къараррикай сад фашистрин винел гъалибвал къачур ветеранриз гузвай пулдин куьмек артухаруниз талукь тир. 2021-йисуз чна ветеранриз гузвай куьмек 10 сеферда гзафарна: гьар вацра гузвай 2 агъзур манатдин чкадал абурун гъилиз 20 агъзур къвез гатIунна. Гила чна и рекъем мадни артухардай (кьве сеферда) къарар кьабулнава.
Чи чIехи бубайри а йисара къалурай акьалтIай викIегьвилерикай виридаз хабар ава, тикрарун герек туш. Амма чна а дяведин ветеранриз гьикьван куьмекар гайитIани, чун гьамиша Гъалибвилин несилрин вилик буржлу яз амукьда», — кхьенва вичин каналда С. Меликова.
«Лезги газет»
