Алибег Фатагьов 1910-йисуз Куьре ок­руг­дин (гилан СтIал Сулейманан район) Цмур­рин хуьре дидедиз хьана. 1935-йисуз (къени тайин тахьанвай агьвалатра)  кечмиш хьана.

Адан сурни жагъанвач. 1964-1965-­ йисара зун писателрин союздин­ лезги­ секциядин кьил тир. Алибег Фатагьован 55 йис жезвай­вилин ва а рекъем­ са гьал акакьдайвал къейд авунин патахъай за гаф кудна­. Писателдин гьуьр­метдиз акъуд­дай серенжемрик рагьметлудан сурал цуьк­вер, алачтIа, гуьмбет эцигун… хьтин теклифар квай.

Сур гьина ава, хуьре, шегьерда? — суал кватна. Са литераторди бес сур вичиз чида ва чаз, жегьилриз, сур къалурда лагьана.

Пакадин юкъуз рагьметлу Алибег­ Фатагьован сурал цуьквер эцигиз фин меслят хьанвай вахт алукьдалди вичиз гуя сур чида лагьай литератор атана акъатна ва вичиз сур чидач лагьана. Зани тади гьалда, ван хьайи гъейри кас хъуьруьн тавун патал секциядин членриз са-садаз хабар ракъурна, бес гьал-кьиса икI я, касдиз сур чизвач.

Вичин къанни вад йисан уьмуьрда­ Алибег Фатагьова прозадин ва поэзиядин хейлин эсерар яратмишна. А эсеррин автордин тIвар чи литература­дин наз-дамахдин тIварарикай сад я.

Ибрагьим  Гьуьсейнов

__________________________

Алибег Фатагьован кьуьл

Алибега кьуьл ийизва, газетдиз

Мухбир хьанва, са макъала кхьенва:

Бине жезва эдебият девлетдиз,

Виш йисарин бахт миллетдиз хъуьренва.

 

«Лугьудай бес халкьди вичин дидедин

ЧIал кьабулдач: вердиш хьанва туьрк чIалав.

Аквазвани ваз, Межидов Къейседин*.

Рухваяр гваз агахьнавай юрк чIалав?

 

Къе савадлу мухбир жеда, пакани

Шаир жеда, авам тушир, кIелнавай,

Хкаж жедай вичин кIвални, акани,

Хуьруьн кимни, гележегда гелнавай».

 

Алибега кьуьл ийизва, Къейседин,

Къиясудин, Къияс къивдал ацалтна.

Шадзава ам, шадвал акваз бедендин,

Чин ифена, хъуькъверни — яр акьалтна.

 

«Вири жеда, драмаяр, романар,

Гележег хьиз, тарихни чаз чир жеда.

Къенин зи кьуьл, гележегдин инсанар,

Амукь тийин, белки, квез са сир хьана».

*  *  *

Алибег Ичина Вердидин муькъвел,

Алибег вирина дердидин муькъвел.

 

Фикирар къавахдин кьакьанрин кукIва,

Алибег Фатагьов душмандин юкьва.

 

Инсанрихъ инсанвал жедалди гьеле

Алибег рахана инсандин меле.

 

Къавуз гуз тапракдиз вегьенвай руквар,

Инсандин кьилелай кIвахинни, халкьар?

 

Шиирчи накьвадин чиркерин юкьва,

Шаир чи пакадин цуькверин юкьва.

__________________

* Межидан Къейседин, Къиясудин, Къияс — шаир­, драматург, Дагъустандин халкьдин писатель Къияс Межидов, — Ред.