Махсус серенжемдикай

Россиядин армияди махсус серенжем кьиле физвай саки вири терефра гьужум ийизва. «РИА Новости» чешмеди хабар гузвайвал, идакай 9-декабрдиз Яракьлу Къуватрин Генштабдин начальник Валерий Герасимова ихтилатна.

Герасимова Днепропетровскдиз мукьва мулкара­ «Центр» кьушунрин аскерри женгинин тапшуругъар тамамарзавай гьал ахтармишна. Ада къейд авурвал, Красноармейскда инсанар яшамиш жезвай магьалар ахтармишзава, ислягь агьалийриз герек куьмекар гузва. Шегьердай 200-далай гзаф ксар хаталувал авачир чкадиз куьчарнава. Красноармейск азад авурдалай кьулухъ Россиядин кьушунрин тапшуругъ Димитрован­ районда элкъуьрна кьунвай ВСУ-дин кIеретIар терг авун жеда. И кардал, Генштабдин кьили къейд авурвал, кьилдин мотострелковый бригада машгъул жеда.

Красноармейск ва Димитрован кьиблепатан пай гуьзчивилик кутунвайдакай Россиядин Президент Владимир Путиназ ноябрдин эхирда хабар ганай. Донбассда улакьрин жигьетдай ВСУ патал важиблуди тир и чка чибурун гуьзчивилик акатун хъсан агалкьун яз гьисабзава. И район азад авуни ДНР-дин рагъакIидай патан часпаррихъ фидай ва Запорожьедин областда гьужумар давамардай мумкинвал гуда. Кьилди «Центр» кьушунрин жавабдарвилик квай мулкара мидяйрикай суткадин къене 425 кас, гьакIни 2 ББМ, 5 автомобиль, артиллериядин яракь ва РЭБ тергна.

Украинадин кьушунри гьар юкъуз РФ-дин жуьреба-жуьре регионрихъ пилот галачир аппаратар ахъайзава­. Россиядин оборонадин министерстводи хабар гайивал, 8-декабрдин йифен сятдин 11-далай 9-декабрдин экуьнин сятдин 7-далди ПВО-дин такьатри 121 БПЛА яна.

8-декабрдиз РФ-дин оборонадин министерстводи малумарай делилралди, махсус серенжем кьиле тухунив эгечIайдалай инихъ Россиядин Яракьлу Къуват­ри Украинадин 668 самолет ва 283 вертолет, зенитный ракетайрин 639 комплекс, пилот галачиз лув гудай 101131 аппарат, 26445 танк ва дяведин маса машинар, РСЗО-дин 1627 машин, артиллериядин ва маса 31788 яракь, военный махсус 48590 автомашин тергна.

Кьил къакъудзава

Украинадин кьушунра гьакъидихъ женгера ишти­рак­завай чара уьлквейрин аскерар украинвийрин гуьз­­чивилик квай Запорожьедин областдин мулкарай­ эхкъечIнава. Идакай «ТАСС» чешмеди хабар гузва. «Запорожьедин терефда патан аскерар саки амач. Анжах Латиндин Америкадай ва Польшадай атанвай гъвечIи кIеретIар ама. Умуми гьалар пис хьуникди муькуьбур хъфена», — кхьизва чешмеди.

Къейдзавайвал, лап къизгъин гьалар арадал атай макъамра сифте нубатда кьил къакъудзавайбур гьа­къи­дихъ кьунвай аскеррикай ибарат кIеретIар я.

Икьрардал амалзавач

9-декабрдиз «РИА Новости» чешмеди хабар гайивал, Израилдин женгинин авиацияди Ливандин кьиблепатан дагълух магьалриз ягъунар кьуна. Нетижада инсанар яшамиш жезвай са шумуд кIвализ зарар хьана.

ЦIай тагунин патахъай хьанвай икьрардал амал тавуналди, Израилди Ливан республикадин аслу туширвал чIурзавай гьерекатар мукьвал-мукьвал ийизвайдакай Ливандин гьукумдарри идалай вилик са шумудра малумарнай.

Ливандин МВД-дин делилралди, 2025-йисан сифте кьилелай Израилди 4,5 агъзурдалай гзаф гьужумар авуна. Нетижада 340-далай гзаф ксар кьена, саки 700 касдал хирер хьана.

Гуя киберкъурхуяр гузва

Великобританиядин МИД-дин кьил И.Купера уьл­кведини Европади гуя Россиядин патай авай киберкъурхуйриз акси серенжемар кьабулун патал тади гьалда къуватар сад авун герек яз гьисабзава. Гьа са вахтунда чиновникдивай вичин гафар успатдай са делилни гъиз хьанач.

«Лезги газет»