18-октябрдиз Москвада яргъал чIугур азардик тIвар-ван авай алим, лезгийриз чпин тарихдин ва культурадин рекьер хъсандиз чир хьун патал еке зегьметар чIугур Ариф Гъалибович Садыкъи рагьметдиз фена. Адан 70 йис тир.
Ариф 1955-йисан 29-июлдиз Кьасумхуьруьн райондин Герейханован тIварунихъ галай совхоздал лезгийрин машгьур алим-арабист Гъалиб Муьгьуьддинович Садыкъидин хизанда дидедиз хьана. Юкьван школа Махачкъалада акьалтIарайдалай кьулухъ ада Дагъустандин госуниверситетдин къецепатан чIаларин факультетда кIелна, адакай ингилис чIалан пешекар хьана. Ахпа ада кIелунар М. В. Ломоносован тIварунихъ галай МГУ-дин аспирантурада давамарна, адакай политологиядин илимрин кандидат хьана. А. Садыкъиди Урусатдин илимрин академиядин Дуьньядин экономикадинни халкьарин арайра алакъайрин институтдин (ИМЭМО РАН) доктарантурадани кIелна. Ада рикI алаз Кавказдин тарихдин месэлаяр ахтармишиз хьана.
Са тарих тушир А. Садыкъидин рикIе авайди. Вич ацукьай ва къарагъай гьар са чкадал Етим Эминан шиирар кхьенвай чарар гъиле авай Ариф Садыкъи алатай асирдин 90-йисара чидай ксарин рикIелай алатдач. Абур ада вичин бубадиз, филологди хьиз, чIехи шаирдин эсерар чапдай акъудун патал гьазуриз куьмекзавай вахтар тир. 1995-йисуз Гъалиб Садыкъиди экв къалурай «Вил атIудач дуьньядихъай…» тIвар алай Е. Эминан эсеррин зурба кIватIал чапдай акъудуниз гьазуруник Ариф Садыкъидин пайни квай.
Манийриз чIалар ва гьаваяр туькIуьрунин, абур лугьунин рекьени А.Садыкъи пара алакьунар авай кас тир. Ам вичи лугьуз хьайи «Диде чилиз», «Муьгьуьббат», «Вуна лугьузва» ва маса манийрин автор тир.
Амма чIалар Етим Эминанбур яз туькIуьрнавай манияр, гитарадихъ галаз ада лугьудайла, ван хьайибур пагь атIана амукьдай. И карда адан алакьунриз мукьва маса са касни чахъ авач…
Са чна чпикай ихтилатар авунвай крара ваъ, маса крарани ам жегьилриз илим ва культура авай пад къалуриз ва абурук руьгь кутаз хьайи кас я.
«Лезги газетдин» редакциядин коллективди, Ариф Садыкъи рагьметдиз финихъ галаз алакъалу яз, адан хизандиз ва вири мукьва-кьилийриз, дериндай хажалат чIугунивди, башсагълугъвал гузва. Адан экуь къамат чи рикIера амукьда.
