29-ноябрдиз Ахцегьрин спорткомплексда азаддаказ кьуршахар кьунай жаванрин арада гьар йисуз кьиле тухун хъсан адетдиз элкъвенвай «Лекидин Кубок» патал республикадин турнир кьиле фида. Адан тешкилатчияр мергьяматлувилин «Леки» фонд ва райондин администрация я.
Вичин макьсад Кьиблепатан Дагъустанда жаванар сагълам уьмуьр кечирмишунал желб авун, азаддаказ кьуршахар кьун машгьурун ва вилик тухун, спортсменрин тежриба хкажун ва Дагъустандин халкьарин арада дуствилин алакъаяр мягькемарун тир и турнирда 2011-2012-йисара дидедиз хьанвай жаванри заланвилин са шумуд категориядай чпин устадвал къалурда.
РикIел хкин: мергьяматлувилин «Леки» фондуни ихьтин турнирар спортдин маса жуьрейрайни тешкилзава.
***
СтIал Сулейманан райондин администрацияда спортда агалкьунар къазанмишай районэгьлияр шад гьалара кьабулун, абур тебрикун фадлай хъсан адетдиз элкъвенва. Азаддаказ кьуршахар кьунай международнный ва Вирироссиядин акъажунра чпин устадвал вини дережада аваз къалурай Агьмед Велиметов ва Умар Абдурагьманов, абурун тренерар Герман Амаханов ва Ибрагьим Царухаев нубатдин сеферда ина шад гьалара кьабулна.
Райадминистрациядин спортдин, туризмдин ва жегьилрин крарин рекьяй отделдин директор Чингиз Абдулмежидова спортсменризни тренерриз къазанмишнавай агалкьунрай, райондин тIвар хкажунай чими келимаяр лагьана, абуруз чухсагъулдин чарар ва пулдин пишкешар гана.
***
Кьурагь райондин администрацияда кьиле фейи шад гуьруьш Кьиблепатан футболдин Лигадин гъалибчийриз бахшнавай. Ана райондин кьил Замир Азизова, адан заместитель Рамазан Катибова, райадминистрациядин ФК-дин, спортдин ва жегьилрин крарин рекьяй отделдин начальник Рамиз Рамазанова, Кьурагьрин 2-нумрадин СОШ-дин директор Магьарам Къазиева, райондин ДЮСШ-дин директор Руслан Бабаева ва райадминистрациядин КНД-дин пешекар Рафик Сефералиева иштиракна.
Гуьруьшдал футболдай и мукьвара школайрин 11 командадин арада инанмишвилелди гъалибвал къазанмишай жаванрин (2011-2012-йисара дидейриз хьанвай) команда шад гьалара къаршиламишна. КIватI хьанвайбуру жаванриз гъалибвал тебрикна, спортда ва кIелунра мадни чIехи агалкьунар хьун алхишна. Жаван чемпионрив З. Азизова дипломар, медалар, пулдин пишкешар ва Кьиблепатан футболдин Лигадин кьилин ярж — Кубок вахкана.
Рагнеда Рамалданова
