Гьар йисуз ноябрдин вацран эхиримжи гьяд юкъуз чи уьлкведа Дидейрин югъ къейдзава. Дишегьлийрин 8-мартдин суварилай тафаватлу яз, и юкъуз вирида анжах дидеяр, дидевилиз кам къачузвай кIвачел залан дишегьлияр, рушар тебрикзава. Дидейрин йикъаз талукь мярекатар Дагъларин уьлкведин меркезда, гьакI рес­публикадин вири шегьерра, районра тешкилзава.

И шад ва метлеблу мярекатда Да­гъустан Республикадин Кьил Сергей Меликова, исламдин бизнесдин международный ассамблеядин президент Марат Кабаева,  РД-дин Халкьдин Собранидин депутатри, гьукумдин органрин векилри­, Россиядин Игитри, абурун ва дяведин махсус серенжемдин иштиракчийрин ди­де-бубайри, гзаф аялар авай дидейри, же­миятдин деятелри, диндин ва жегьилрин тешкилатрин векилри иштиракна.

«Чун чи патай кIанивал, къайгъударвал­ авай дидейрин суварин вилик гуь­руьш­миш хьунихъ еке метлеб ава. Диде­дин­ ­экуь къаматди, адан патай веледриз авай кIанивили чаз датIана къуват гузва, че­тин­вилерай экъечIдай, агалкьунар къазанмишдай, къени крар ийидай, ватан мад­ни кIанардай мумкинвал яратмишзава.

Къенин юкъуз чун ислягь дуьньядихъ, къени крарихъ, хъсанвилерихъ уму­дар аваз яшамиш жезва. Чи дидейри­ чпин веледрин хушбахт уьмуьр патал датIана дуьаяр ийизва. Гьелбетда, алай вахт муракабди я. Гьавиляй вири къурхуяр, кичIевилер яргъариз квахьна, гьар са дидедин  къени мурадар кьилиз акъатдайвал хьурай! Гьуьрметлу дидеяр, Квез за ислягьвал, къенивал, хъсан крар хьун алхишзава.

Дидедив гьуьрметлувилелди эге­чIун вири вахтара дагъустанвидиз хас ери я. Чаз тарихдай малум тирвал, лап четин ва герек атай вахтара чи назик дишегьлийри викIегьвал, дирибашвал къалурна ва чпин уьтквемвилелди дагъвияр душмандин хуруз къарагъарна. Къе арадал атанвай са бязи вакъиайри алатай йисарин игитвилерни рикIел хкиз тазва. Къе, гьуьрметлу дидеяр, куь тIварцIихъ пара хъсан гафар лугьуз кIанзава. Дагъларин уьлкведин гьар са игит хцин алакьунар куьн ва куьне абуруз гайи гьакъи­къи ва дуьзгуьн тербия  себеб яз арадал­ къвезва. Куь уьтквемвилиз, сабурлувилиз, руьгь­дин мягькемвилиз чна, юкь агъузна, икрамзава», — лагьана Сергей Меликова.

Мярекатда 5-далай 10-дав агакьдалди аялриз тербия ганвай, гьакIни чпин рухвайри дяведин махсус серенжемда иштиракзавай дидейрини иштиракна. Абурун арада Асият Мегьамедова, Руманият Шамхалова, Саврижат Рамазанова, Наида Татаева ва масабур авай. Региондин Кьили рикIел хкайвал, рес­публикада дяведин махсус серенжемдин иштиракчияр, абурун хизанар (дидеяр, хендедаяр, вахар) вири рекьерай къайгъударвилик кутадай ва абуруз куьмек гудай фондар, комитетар, жемиятдин тешкилатар кардик ква.

«Аскеррин дидейри, са куьнизни килиг тавуна, СВО-дин иштиракчийриз куьмек гунин карда активвилелди иштирак­зава, масадбуруз чешне къалурзава. И мукьвара Къизляр районда, СВО-дин иштиракчидин диде Хадижат Сайкумовади кьил кутуналди, «РикIел хуьнин багъ» ачухуниз талукь мярекат тухвана. Ихьтин дидеяр республикада гзаф ава. Чна абуруз виридаз баркалла лугьузва.

Чи республикада гзаф аялриз тербия гузвай 125 агъзур хизан ава. Ихьтин­ хизанра, са рахунни алач, дуствилиз, ис­лягьвилиз, меслятвилиз чка гузва. ЧIе­хибуру гъвечIибур инсанвал кваз, зегьметдал рикI алаз, чIехибуруз гьуьр­мет ийидай къайдада вердишарзава. И хизанар ахлакьдин, марифатдин бинеяр давамарзавайбур я. Гьа ихьтин хизанра ватандал рикI алай веледарни чIехи жезва.

Чи уьлкведин Президент Владимир Владимирович Путина лагьайвал, гзаф аялар авай хизанра чIехи хьайибурук умуд кутаз, четин вахтунда абурухъ далуни акализ жеда. Абуру я хизанар, я дустар, кIвалахдин юлдашар ва ватанни маса гудач», —  лагьана региондин Кьили.

Гьелбетда, гележегдин игитар тер­бияламишун регьят кIвалах туш. Дяве­дин махсус серенжемда иштиракай ва иш­тиракзавай 17 дагъустанвидиз РФ-дин Президентдин Указдалди Россиядин Игит лагьай тIвар ганва. А Игитриз тербия гайи дидейриз баркалла гьикI лугьудач. И гуьруьшда иштиракзавай Мадина Абуталимовадин, Марина Исбакиевадин, Лейла Караевадин, Сабина Мегьамедовадин, Магизат Мегьамедовадин, Сапижат Мазаевадин, Валида Муслимовадин, Суна Набиевадин, Хунчаназ Султановадин, Маликат Умаевадин ва Патимат Худайнатовадин зегьметди гьахьтин викIегь ва ватанперес рухваяр майдандиз акъудна.

Дидейрин тIварцIихъ хуш келимаяр исламдин бизнесдин международный ас­самблеядин президент Марат Кабаевани лагьана.

— Ихьтин гуьзел мярекатда иштиракуниз теклифунай куьн сагърай. И югъ себеб яз, чна дидеяр ва абурун патай велед­риз авай кIанивал гьихьтинди ятIа, гьам рикIел хкизва. Чна вири уьмуьрда чи дидейриз гьуьрмет авун лазим я. ­Халис ­ватанпересар тербияламишзавай ди­деяр лап зурба крарин иесияр я, — лагьана М. Кабаева.

Хийир Эмиров