Россиядини Китайди
Россиядини Китайди кудай затIарин ва энергетикадин хиляй кьве уьлкведизни хийир авай зурба проектар гъиле кьадайвал я. «РИА Новости» чешмеди хабар гузвайвал, ихьтин фикир Владимир Путина Россиядинни Китайдин энергетикадин бизнес-форумдал малумарна.
Президентди къейд авурвал, КНР-диз ракъурзавай нафтIадин ва тIебии газдин кьадардал гьалтайла, Россияди сад лагьай чка кьазва. ГьакIни кьве уьлкведин пешекарри атомный электростанцияр эцигунин ва энергоресурсар хкудунин технологияр тамамвилихъ тухунал агалкьунралди кIвалахзава.
Эхир эцигиз кIанзава
Федерациядин Советдин Председатель Валентина Матвиенкодин фикирдалди, США-дин президент Дональд Трампаз Украинадин къалмакъал рикIивайни акъвазардай ният ава. «Зун чIалахъ я хьи, Украинадин патахъай са икьрардал къвез жеда… Чи Президент жанаби Трампахъ галаз Аляскада гуьруьшмиш хьанай. Къалмакъал куьтягьунин патахъай хьайи ихтилатра абур сад-садан гъавурда акьунай…», — лагьанва В. Матвиенкоди «МК» изданидиз гайи интервьюда.
Ада алава хъувурвал, ислягьвал кIан тийизвай европавияр Трампан «гъилер кутIуниз алахъзава».
21-ноябрдиз РФ-дин Совбездин совещанидал Владимир Путина малумарайвал, Украинадин жигьетдай США-дин план къалмакъал ислягьвилелди къайдада тунин бинедиз къачуз жедай хьтинди я, амма РФ-дихъ галаз и текст алай вахтунда веревирд ийизвач.
Къейд ийин, Д. Трампа Украинада къайда тунин патахъай 28 пунктуникай ибарат план тестикьарна. Идалай вилик «Axios» чешмеди Вашингтонди Москвадихъ галаз Украинадин къалмакъал къайдада тунин патахъай «чинебан меслятар» ийизвайдакай кхьенай.
Кьилди къачуртIа, США-дин планда Крым ва Донбасс Россиядинбур яз тестикьарун, Америкади Киевдиз ийизвай военный куьмек тIимиларун, Украинада урус чIал государстводинди яз малумарун, ВСУ-дин аскеррин кьадар тIимиларун ва хейлин маса месэлаяр къалурнава.
«NBC» чешмедин делилралди, план туькIуьрунал кIвалахайбурук са шумуд кас ква: США-дин махсус илчи Стив Уиткофф, вице-президент Жей Ди Вэнс, госсекретарь Марко Рубио ва Трампан езне Жаред Кушнер.
«Berliner Zeitung» чешмеди кхьизвайвал, Украинадин къалмакъалдал эхир эцигун патал Америкади малумарнавай планди Россиядин гъалибвал къалурзава.
РФ-дин Президентдин пресс-секретарь Дмитрий Пескова къейд авурвал, Аляскада Россиядинни США-дин президентрин арада гуьруьш кьиле фейидалай кьулухъ Украинадин къалмакъал ислягьвилелди къайдада тунин жигьетдай цIийи жуьредин гьич са теклифни хьанвач.
Д. Пескова малумарнавайвал, Украинадин къалмакъал къайдада тунин гьерекатра Европадин уьлквейрин иштираквал гуьгъуьнлай герек жеда. «Европада хатасузвилин система веревирд авун, хатасузвилин система авачиз хатасузвилин заминвилин патахъай рахун четин я, европавийрин иштираквал авачиз саки тежедай кар я», — лагьана ада.
Вердишвилер
24-ноябрдилай 4-декабрдалди Финляндиядин ВМС-рин регьбервилик кваз НАТО-дин уьлквейри Балтикадин гьуьле 20 гимидин иштираквал аваз вердишвилерин серенжем кьиле тухузва. Идакай «РИА Новости» чешмеди хабар гузва. Серенжемда Бельгиядин, Даниядин, Эстониядин, Франциядин, Германиядин, Латвиядин, Литвадин, Нидерландрин, Польшадин, США-дин гимийри ва ВМС-рин саки 5 агъзур аскерди, гьакIни НАТО-дин минайриз акси дестеди иштиракзава.
Къейд ийин, Финляндия НАТО-дик Швециядихъ галаз санал 2023-йисан 4-апрелдиз экечIна. Виликдай Владимир Путина Дмитрий Киселеваз гайи интервьюда къейд авурвал, и уьлквеяр альянсдик экечIун милли итижар хуьнин жигьетдай метлебсуз кам хьана: абурун часпаррив Россиядин кьушунар ва яракьар пайда жеда. Кремлди хабар гузва хьи, Россияди садазни гьелягьар кьазвач, къурху гузвач, амма уьлкведин итижар патал мумкин тир хаталувал авай гьерекатриз жаваб таганани тадач.
«Лезги газет»
