Алатай ислендиз Сергей Меликова СВО-дин иштиракчийрин багърийрихъ галаз нубатдин гуьруьш кьиле тухвана. Сифте нубатда ада дяведин махсус серенжемда игитвилелди телеф хьайи дагъустанвийрин суьретрив цуьквер эцигна, декьикьада кисна акъвазуналди, чанар къурбанд авурбур рикIел хкана.
«Республикадин кьиле авайбурун, чи вири ватанэгьлийрин тIварцIихъай за квев рикIин сидкьидай майилвилин гафар агакьарзава, куь дердиникай хабар кьазва, телефвилер хьунихъ галаз алакъалу яз башсагълугъвал гузва. Чна абур рикIера хуьзва, гьунарлувал къалуруналди, чи Ватан хуьналди, абуру чпин чанар къурбандна. Чун неинки абур рикIел хуьниз, абурун гьуьрметдиз къимет, гьакIни абурун мукьва-кьилийриз, багърийриз куьмекар гуниз мажбур я», — лагьана С. Меликова.
Къейд авурвал, аскервиле къуллугъзавайбурун хизанривай государстводин патай куьмекрик умуд кутаз жеда: куьмекар гуниз талукь федеральный ва региондин са жерге серенжемар арадал гъанва.
Гуьруьшда иштиракай Дагъустандин военный комиссар Абдурагьман Мурадханова федеральный дережада тайинарзавай пулунин такьатрикай, кьезилвилерикай ихтилатна, РД-дин зегьметдин ва яшайишдин рекьяй вилик финин министр Мегьамедзагьид Кихасурова — регионда тайинарзавай такьатрикайни кьезилвилерикай. Кьилди къачуртIа, телеф хьайи аскеррин хизанриз пулунин такьатар, и рекьяй куьмекар, чилин участок, коммунальный къуллугъриз талукь харжийрин пай эвез яз вахчудай мумкинвал талукь я. Ибурулайни гъейри, аскервиле къуллугъзавайбурун аялар вузрикни колледжрик экечIдайла, кьезилвилер тайинарзава.
Гуьруьшдин вахтунда С.Меликова СВО-дин иштиракчийрин хизанэгьлийрин тIалабунрихъ яб акална ва талукь ксарал абурун месэлаяр гьялун тапшурмишна.
Чи мухбир
