Хуьрек гьазурун ашкъидалди ийидай кар я. Неинки дишегьлийрин, гьакI бязи итимринни ам рикI алай кар хьанва. Амма и кIвалах чпин пешедиз элкъвенвай инсанарни ава. Абуру уьмуьрдин чIехи пай къапарихъ, катулрихъ, хуьрек гьазурдай пичинихъ галаз алакъалу авунва. Виридаз хуш жедайвал дадлу хуьрек гьазурун регьят везифа туш. Амма кьве вишелайни гзаф аялриз гьазурна тIуьн гун… Гьаниз килигна, мектебдин ашпаздин зегьмет тариф авуниз лайихлу я.
Гьа ихьтин са ашпазди Мегьарамдхуьруьн райондин Советский хуьруьн юкьван мектебда зегьмет чIугвазва. 2024-йисуз Дагъустандин образованидин министерстводи тухвай Вирироссиядин конкурсдин региондин паюна Советский хуьруьн юкьван мектеб «Мектебдин лап хъсан столовой — 2024» тIварцIиз лайихлу хьана. Республикадин дережада ихьтин агалкьун мектебдин ашпаз Эсмира Керимовнади вичин пешекарвилин вини дережа тестикьарун я.
Ашуралиева Эсмира 1972- йисуз СтIал Сулейманан райондин Агъа Хъартасрин хуьре муаллим Керим Керимован хизанда дидедиз хьана. Сифте хуьруьн, 9-10-классра Улу-Гъетягърин мектебра кIелна. Гуьгъуьнлай а вахтунда Кьасумхуьрел ачухнавай алишверишдин колледждик экечIна. 20 йис тамам хьайила, ада Советский хуьруьн агьали, водитель яз кIвалахзавай Ашуралиев Мусаибахъ галаз кьисметар сад авуна.
Ашпаз Эсмира Керимовнади кафейра, столовойра, мел-мехъеррин шадвилера гьакъисагъвилелди зегьмет чIугуна, жемятдин патай гьуьрмет къазанмишна.
Аялриз тIуьнар гьазурдай ашпаз герек хьайила, тIямлу хуьрекар гьазуриз, хуьре тIвар-ван акъатнавай Эсмира Керимовнадиз кIвалахал атун теклифна.
Ингье 2020-йисалай гилалди, ада неинки халисан пешекар, гьакIни устад ашпаз яз, мектебдин аялриз тIуьнар гьазурзава.
Мектебдин чIехи, экуь, михьи столовой акурла, чаз пара хуш хьана. Гьазурзавай хуьрекрин атир къвезва. Алай аямдин вири тадаракар ава. И арада, шад ван кьилеллаз, аялар столовойдиз гьахьна…
Эсмира Керимовнадин кIвалахдин югъ сятдин иридалай гатIун жезва. Менюдиз килигна, гьазурвал аквазва. Лазим тир продуктар складдай къачузва. Хуьрек авун патал суьрсет гьазурзава, куьлуь ийизва… Сятдин цIуд жедалди ада вичин коллективдихъ галаз сифтегьан классра кIелзавай аялриз хуьрекар гьазурзава. Ам вичин кIвалахдикай сивел хъвер алаз рахазва: «Гьелбетда, кIвалах регьятди туш, ятIани, заз зи пеше кIанда. Аялри иштагь аваз недайла, рикI шад жеда».
– Эсмира Керимовна, мектебда тIуьн гузвай гьикьван аялар ава? — хабар кьуна за.
— ТIуьн сифтегьан классрин аялриз гузва. Абур чахъ 200-лай гзаф ава.
– Гьар са аялдиз гузвай тIуьниз шумуд манат акъатзава?
— Райондин администрацияди кьабулнавай къарардалди, — 78 манат. Эгер йисан эхирдай, кьенят авуниз килигна, пул амукьиз хьайитIа, адан кьадар гзаф жезва. ИкI, алай йисан ноябрдин вацран сифте кьилелай и делил 121 манатдиз барабар хьанва.
– Вири шейэрин къиметар хкаж хьанвай алай вахтунда квевай винидихъ лагьай пулунин кьадардихъ хъсан тIуьн гьазуриз жезвани?
— Эхь. Гьазурзавай хуьрекдин менюда кьуд пай ава. Сад лагьайди — некIедин, харарин, як квай шурва ва борщ. Кьвед лагьайдак акатзава: аш, гуляш алай картуфрин пюре, макаронар. Ахпа къаймах, къатух, салатар, гуьгъуьнай я миже, я чай ва емишар. Ибур вири са юкъуз ваъ, йикъар какадариз, ассортимент дегишариз гузва. Гьар юкъуз тух жедай ва витаминралди девлетлу тIуьн гузва. Чи кIвалахда виридалайни хушди, гьелбетда, сагълам, тух ва рази аялар акун я.
Малум хьайивал, мектебдин ашпазди хуьрекар, рецептрал — технологиядин картайрал амал авуна гьазурзава. Аялрин сиверай ван хьайивал, Эсмира Керимовнади гьазурзавай хуьрекар дадлубур жезва. «Куьне аник вуч кутазва?» — лагьана гайи суалдиз, ада икI жаваб гана: «Мектебдин менюдик сирлу са затIни квач, вири адетдин шейэр я. Аялри иштагь аваз незва. Дадлу вучиз жезва лагьайтIа, чна тIуьн рикI гваз гьазурзава, заз чиз. За мектебда кIвалахиз вад йис я. И йисара гьикьван аялриз хуьрекар гана! Чи аялриз зун чизва. Куьчедай тIуз фидайла, зи гуьгъуьниз гьарайда: «Эсмира хала, пака куьне чаз гьихьтин хуьрекар гьазурда?»
«Гьазурзавай хуьрекар аялри иштагь аваз тIуьни ашпаз вичин кIвалахдив рикI гваз эгечIзавайдакай лугьузва. ИкI хьайила, хуьрекар дадлубур жезва. Мектебда кIвалахзавай йисара чаз ам неинки намуслу, жавабдар, гьакIни аялрал рикI алай ва абурун гъавурда гьатзавай инсан хьиз чир хьана. Им аялрихъ галаз кIвалахзавай тешкилатда лап важиблу я», — лугьузва мектебдин директор Ренат Мамедгьуьсейнова.
Эсмира Керимовнадихъни Мусаиб стхадихъ гьуьрметлу, бахтлу хизан ава. Абуру чпин пуд веледдизни мехъерарнава, абур динжарнава. Веледри дидедизни бубадиз муьжуьд хтул багъишнава. Къуй вири сагъ-саламат, бахтлу хьурай!
Къагьриман Ибрагьимов
