Алай йисалай Дагъустанда инженервилин рекьяй пешекарар гьазурун патал кьабулзавай студентрин кьадар 15 процентдин гзафарнава. Республикадин машиностроенидин хиле кадрийрин кьитвал авайдакай эхиримжи йисара мукьвал-мукьвал лугьузвай.
РД-дин образованидин ва илимдин министр Ягья Бучаева хабар гайивал, цIи инженервилин рекьяй пешекарар гьазурун патал кьабулзавай студентрин кьадар гзафарнава ва и рекье цIийи программаяр кардик кутунва: «Мастер контрольно-измерительных приборов и автоматики», «Оператор-наладчик металлообрабатывающих станков», «Аддитивные технологии», «Мехатроника и робототехника». Инженервилин рекьяй пешекарар гьазурдайла, къейдзавайвал, республика вад йисан вахтунда виликди финин стратегиядин макьсадар ва Дагъустандин мулкунал уьмуьрдиз кечирмишзавай инвестицийрин проектар фикирда кьазва.
«Республикадин образованидин идарайри чпин кIвалах цIийикIа туькIуьр хъувунва ва выпускной курсарин студентар тежриба къачун патал карханайриз рекье твазва, гьеле кIелунин рехъ акьалтI тавунмаз, абуру производствода кIвалахиз башламишдай шартIар тешкилзава. Вахтунилай фад къуллугъдал тайин хьунин, яни 3-курсарин студентар чирвилер гунин рекье кьилдин графикдал элячIунин ва карханада кIвалахиз башламишунин нетижада чавай карханайрихъ инженервилин и ва я маса пешедин рекьяй авай кьитвал са кьадардин арадай акъудиз жезва. Инал къейд ийин хьи, гьар са заводдихъ, карханадихъ анжах вичиз талукь тир кьетIенвал ава. Эгер 2020-йисуз колледжри «машиностроение» рекьяй пешекарар гьазурунин программайрай 75 кас кьабулзавайтIа ва абурукай садни кIелзавай йисара тежриба къачуз хьайи карханайра кIвалахал акъваззавачиртIа, эхиримжи пуд йисан вахтунда и гьерекат хъсан патахъ дегиш хьанва», — малумарна министрди.
Амина Муслимова
