И йикъара чав пашман хабар агакьна: Каспийск шегьердин кIвалериз чимивал агакьарзавай «КаспийТеплоСервис» ООО-да яргъал йисара зегьмет чIугур тежрибалу слесарь, гьа са вахтунда вичин вири уьмуьрда хайи чIалахъ ва халкьдин эдебият, милливал ва меденивал хуьнихъ рикI куз хьайи «Лезги газетдин» амадагрикай сад тир Магьамдалиев Ярали Мирзалиевич яргъалди чIугур начагъвиликди рагьметдиз фена. Аллагьди рагьметрай вичиз!
Я.М. Магьамдалиев 1958-йисан 8-мартдиз Кьурагьрин хуьре зегьметчи еке хизанда дидедиз хьана. Гьеле мектебда кIелзавай йисара ада яратмишунин рекьихъ ялиз хьанай. Аквар гьаларай, бажарагъдин илгьам адаз Кьурагь райондин газетда яргъал йисара мухбир яз кIвалахай, гьа са вахтунда республикадин лезги газетдихъ галазни датIана алакъа хуьз хьайи буба Мирзали Магьамдалиеван патай атана.
10-класс акьалтIарай жегьилди шикилар ядай пеше хкяна ва и рекьяй чирвилер къачуна. Амма кьисметди ам хизанни галаз Узбекистандин Ташкент шегьердиз акъудна. Ина ада 16 йисуз жуьреба-жуьре кIвалахар тамамарна, зегьметдин рехъ производстводин хилехъ элкъвена. 16 йисалай Каспийскдиз хтайла, ада зегьметдин рехъ «КаспийТеплоСервис» карханада давамарна. Гзаф йисара намуслувилелди кIвалахай и коллективда ада еке гьуьрмет къазанмишна.
Ярали Мирзалиевича яратмишунин рекьизни фикир гузвай, «Лезги газетдиз» макъалаяр кхьизвай, карханада жезвай цIийивилерикай хабар гузвай. Гьар са лезгидин кIвале «Лезги газет» хьун ада иллаки важиблу кар яз гьисабзавай. Подпискадин кампаниядин вахтунда и карда куьмек гун ада вичин руьгьдин буржи яз гьисабдай. 2022-йисуз Украинада дяведин махсус серенжем башламишай чIавалай ада хайи коллективдихъ галаз санал СВО-дин аскерриз куьмекунин кIвалахра активнидаказ иштиракзавай. Гьар са карда вилик экечIдай, жегьилриз насигьатчивалдай, зайифдаз куьмек гудай къени инсан тир Ярали Мирзалиевич Магьамдалиеван экуь къамат юлдашрин, ам чидай вирибурун рикIера амукьда.
«Лезги газетдин» редакциядин коллективди рагьметлудан хизанриз, Майрам Магьамдалиевадиз, вири мукьва-кьилийриз, дериндай хажалат чIугунивди, башсагълугъвал гузва.
