Махсус серенжемдикай
РФ-дин оборонадин министерстводи 17-ноябрдиз малумарай делилралди, махсус серенжем кьиле тухунив эгечIайдалай инихъ Россиядин Яракьлу Къуватри Украинадин 668 самолет ва 283 вертолет, зенитный ракетайрин 636 комплекс, пилот галачиз лув гудай 97097 аппарат, 26071 танк ва дяведин маса машинар, РСЗО-дин 1613 машин, артиллериядин ва маса 31363 яракь, военный махсус 46914 автомашин тергна.
Россиядин оборонадин министерстводин ва Яракьлу Къуватрин генеральный штабдин делилралди, 2022-йисан 22-февралдилай инихъ Украинадин армиядай терг хьайибурун кьадар 1,5 миллиондив агакьнава. Алай йисан эвел кьилелай инихъ Украинадин аскеррикай хкатайбурун ва хирер хьайибурун кьадар 450 агъзурдалай алатнава.
И йикъара военный пешекар В. Дандыкина малумарайвал, ВСУ-дин кьиле авайбуру Красноармейск ва Димитров шегьерар патал женгер давамарунин къарарди мидя мад зайифарда.
Украинадин кьушунри гьар юкъуз Россиядин регионрал пилот галачир аппаратар ахъаюн давам жезва. Россиядин ПВО-дин такьатри абур кьазва. Бязи дуьшуьшра яшайишдин ва маса кар алай объектриз зиянар жезва.
Россиядин кьушунри аскерар, махсус техника, гьакIни оборонадин промышленность, военный маса идараяр алай чкайриз ягъунар кьазва.
Алишвериш давамарна кIанзава
Туьркиядин «Родина» партиядин векил Х. Топкурулуди малумарайвал, США-динни ЕС-дин аксивилериз дурум гуналди, Туьркияди алишверишдин рекьяй Россиядихъ галаз алакъаяр давамарун герек я. МасакIа хьайитIа, адан фикирдалди, Туьркия экономикадин жигьетдай нагьакьан судуррал къведа.
Къейд ийин, идалай вилик США-дин президент Дональд Трампа Россиядихъ галаз алакъалувилелди кIвалахзавайбуруз акси санкцияр малумарун патал конгрессди теклифнавай законопроектдин тереф хвенай.
«Хсуси итижар хуьн патал Туьркия Евросоюздини США-ди ийизвай аксивилерин хура акъвазун ва ада Россиядихъ галаз савдаяр давамарун лазим я. Китайдини Индияди хьиз», — лагьана ада.
Октябрдин эхирра республикавийрин патай США-дин сенатдин регьберди Россиядиз акси санкцийрин законопроект, эгер Лацу кIвалин администрациядиз чарасузвал аваз акуртIа, сесер гун патал малумариз гьазур тирдакай лагьанай.
22-октябрдиз США-дин финансрин министерстводи «Роснефть», «Лукойл» тешкилатриз акси санкцияр кардик кутуна. Вашингтонда ацукьнавай гьукумдарри гъавурдик кутазвайвал, и аксивилер гуя Россиядиз Украинадиз талукь яз ислягьвилин гьерекатар давамариз кIанзавачирвиляй авунва.
РФ-дин Президент Владимир Путина малумарайвал, аксивилин цIийи серенжемри Россиядин экономикадиз виле акьадай жуьреда таъсирдач. Гьа са вахтунда ихьтин гьерекатри нафт ва нафтIадин суьрсет садлагьана багьа хьунал гъида, гьа жергедай яз — США-дин автозаправкайрални. Президентди гьакIни къейдна хьи, гила гуьнгуьна гьат хъийиз башламишнавай Россиядинни США-дин алакъаярни санкцийри мягькемардач. ГьакI ятIани, Москвади Вашингтондихъ галаз рахунар давамаруникай кьил къакъудзавач.
Еврокомиссиядилай нарази я
Украинадиз пулунин куьмек гунин жигьетдай гьакъикъи теклифар малумарзавач лугьуз, Евросоюзди Еврокомиссия критика ийизва. Кьилди къачуртIа, ЕС-ди Россиядин активар ишлемишун лап хъсан кар тирдахъ чIалахъ хьун патал алахъунар ийизва.
«Politico» чешмеди хабар гузвайвал, вичин тIвар малумар тавунвай Европадин дипломатди Еврокомиссияди вахт серфунал эхир эцигун ва теклифрин патахъай малуматар раижун герек тирди лугьузва. Адан фикирдалди, уьлквейриз куьн тереф хуьзватIа чир хьана кIанзава.
Къейд ийин, Россияди Украинада дяведин махсус серенжем башламишайдалай кьулухъ Евросоюзди ва «G7» кIватIалдик квай уьлквейри РФ-дин такьатар (тахминан 300 миллиард евро) чпин ихтиярдиз къачуна. Абурукай 200 миллиард евродилай гзаф ЕС-да ава. Еврокомиссияди алай йисан январдилай сентябрдалди Россиядин активрилай жезвай къазанжидикай 14 миллиард евро Украинадиз ракъурайдакай малумарнай.
Гьазурайди — К. Ферзалиев
