И йикъара зи къунши Даиран хва СВО-дай кlвализ отпускдиз хтанвай. И мумкинвиликай менфят къачуна, чна аскердин уьмуьрдикай ихтилатар авуна. Агьмадов Кьасум 2004-йисуз Дербент райондин Белиж поселокда улакьчи Даиран хизанда дидедиз хьана. 9-класс поселокдин 4-нумрадин мектебда акьалтlарна, ам Дербент шегьердин ракьун рекьерин колледждик экечlна.
Колледж акьалтlарайла, адаз Россиядин армиядин жергейриз эверна. Крымдиз акъатай жегьил аскер гьуьлерин майданар хуьдай военный частуна водителвиле тайинарна. И вахтунда РФ-дин оборонадин министерстводихъ галаз икьрар кутlунна, къуллугъ авун теклифзавай. Пуд вацрани къуллугъ тавунмаз, ада Россиядин МО-дихъ галаз икьрар кутlунна. Ам Забайкальедин военный округдин ракетайринни артиллериядин дивизиядиз ракъурна.
Чита шегьерда авай военный частуна ада электрик-водитель яз къуллугъиз гатlунна. Пешедин ва военный рекьяй чирвилер хкаждай тарсар тухвайдалай гуьгъуьниз декабрдин вацра ам Астрахандиз командировкадиз ракъурна. Ина авай полигондал адан хиве икьван гагьда гьал тавур цlийи «Панцирь-С1М» улакь туна. СВО-да иштиракнавай командирри цlийиз атанвайбуруз, локаторди лишан кьуна, душмандиз ракетайрай цlай гудай и улакьдал кlвалахиз чирна. Инай Кьасум вичел ихтибарнавай улакьни гваз Ростовдин Каменск-Шахтинск шегьерда авай военно-космический кьушунрин частуниз рекье туна.
Кь. Агьмадован гафарай малум хьайивал, командирри тапшуругъ гайи Луганскдин мулкариз физ, анра чпин вилик эцигнавай везифаяр тамамариз, аскерар элкъвена базадиз хквезва. Базада вичин улакьдал гъил элкъуьрна, чкадиз хкана, лазим кьадар ракетаярни эцигна, ам нубатдин приказ вилив хуьз акъваззава. Йиф-югъ талгьана, абур са кlвачел ала. Буйругъ ганмазди, женгинин тапшуругъ тамамариз рекье гьатзава.
— Армиядин жергейра аваз пуд варзни тахьанмаз, кlвале авай чlехибурал меслятни тавуна, икьрар кутlунна, къуллугъ давамаруникай дахдиз хабар хьайила, ада и кар гьикI кьабулна, — хабар кьуна за.
— Гьелбетда, наразивал къалурна. Зун жегьил я. Военный улакьрал аялзамаз зи рикl алайди тир. Гилан аямдин цlийи военный техникадал кlвалахун зи мурад тир. Чна къуллугъ тавурла, бес ни ийида?! Гьажи Давудан хьтин руьгь авай жегьил дагъвияр — Ватан игитвилелди хуьзвай кьегьалар — ана гзаф ава, — лагьана Кьасума.
Ингье алай йисан октябрдин вацра Кьасума, икьрар кутlунна, военно-космический къуватра механик-водитель яз къуллугъ ийиз са йис хьанва. Четин шартlари ам лигимарнава. Адан рахунар, акунар дегиш хьанва. Вичин яшариз килигайла, адан кьатlунар уьмуьрдин уькlуь-цуру акунвай инсандинбур хьанва.
Ада вич миллетчийрин дрондин кьиникьикай хкатай са вакъиадикай секиндиз ихтилатзава: «Чун — зун, оператор ва командир, нубатдин буйругъ атайла, адет хьанвайвал, виликамаз женгинин яракьар эцигна гьазурнавай улакьда акьахна, чаз къалурнавай чкадал фена. Анрал фейи бязи вахтара тревога тапанди жезва. Мукъаят тиртlани, чна миллетчийрин дронрихъ галаз тухудай женг регьятди жеда лагьана фикирнавай. Чкадал агакьай са герендилай чал миллетчийрин дронрин луж атана. Чи экипаждин оператордини командирди авай цlуд ракетадай цlуд дрон яна, тергна. Абуру чпин везифаяр тамамардайла, зи везифа мукъаятдиз къваларив физвай гьалариз килигун ва душмандикай улакь хуьн тир. Къваларив гвай гьалариз килигайла, артиллеристрини, мобилный ударный дестедини женгина викlегьвилер къалурзавай. Локатордилай чал къвезвай дрон акуна, ам ягъиз гатlунайла, малум жезва хьи, ракетаяр вири ишлемишнава. Командирди заз эмирзава: «Улакь хуьх!» Са секунддани энгел тахьана, машин там галай патахъ элкъуьрна, за газ гана. 60-70 метрни гьал тавунмаз, чи машиндай цlаяр акъатна. Машиндай хкадарна, чун гьарма сад са патахъ катна, ярх хьана. Са тlимил вахт алатайла, вири секин хьана. Зун жуван улакьдин патав фена. Килигайтlа, улакьдихъ галукьнавайди дрон тушир, токдин линиядин симинихъ зи улакьдин рациядин антенна галукьна, цlаяр акъатнавай. Чун кlватl хъхьана, улакь кlватl хъувуна, ракъинин цуьквер цанвай никlин юкьвай тlуз фурарилай, хуьлерилай цавуз акъатиз, ахлукьиз, газ гана, базадал хтана. Ракетаяр вахчуна, мад женгиниз гьерекатна. И йифиз чи экипажди 20 дрон тергна…».
Кьасум вичел ихтибарнавай улакьдал акI ашукь хьанва хьи, килиг ада вуч лугьузватlа: «Панцирь-С1М» чуьлда кьиле физвай женгера умудлу, вижевай яракь я. ЗПРК-ди чи патахъ къвезвай гуьллеяр ракетайрай 20 км мензилда амаз яна, тергзава. Идалайни гъейри, панцирдал са декьикьада 5 агъзур гуьлле ахъайзавай сад-садахъ галкlурнавай зенитный автоматарни ала. Панцирь миллетчийрин зегьле тухудай яракь я.
Чи везифа, йиф-югъ талгьана, душмандин яракьар кукlварун я. Чаз женгинин кар тамамариз чизва. Чун гъалибвал чи пата жедайдахъ инанмиш я».
Женгера къалурнавай жуьрэтлувиляй ва кьегьалвиляй ефрейтор «За боевое» отличие», Суворован ва «За воинскую доблесть» 2-дережадин медалриз лайихлу хьанва.
Къагьриман Ибрагьимов
