Агропромышленный комплексда карчивилин кIвалахдал машгъул жез кIанзавай дяведин махсус серенжемдин иштиракчийриз ва ветеранриз государстводин патай куьмек гунин месэладиз талукь совещанидал РД-дин Гьукуматдин Председатель Абдулмуслим Абдулмуслимова хабар гайивал, федеральный бюджетдай СВО-дин иштиракчияр патал 15 миллион манат рекье твада.
Премьер-министрди рикIел хкайвал, хуьруьн майишатдин хиле зегьмет чIугваз кIанзавай СВО-дин иштиракчияр патал государстводи са шумуд терефдихъай куьмек гуда. Абурукай сад «Агромотиватор» грантдиз ухшар авай программа я.
Хуьруьн майишатдин суьрсет гьасилзавай СВО-дин ветеранриз ва иштиракчийриз государстводин патай 2025-йисалай куьмек гузва. И программади СВО-дин иштиракчийриз, агробизнес кардик кутуналди, ислягь зегьметдив эгечI хъийидай мумкинвал яратмишзава.
Абдулмуслим Абдулмуслимова хабар гайивал, 2025-йисуз Дагъустан Республикадиз чара ийизвай такьатри 15,7 миллион манат тешкилзава. Санлай къачурла, РФ-дин хейлин регионриз федеральный бюджетдай 200 миллион манат ахъайдайвал я. Къведай йисуз и жуьредин такьатар мадни гзафарда.
«Чаз чизва, СВО-дин иштиракчийрин ва ветеранрин арада чпин уьмуьр хуьруьн майишатдихъ галаз алакъалу авунвай ва ана зегьмет чIугунвай хейлин инсанар ава. Чна абуруз хсуси карчивилел машгъул жедай шартIар тешкилун лазим я. РД-дин Гьукуматдин къарардалди чна «Агромотиватор» грант гунин къайдаяр, адан макьсадар, шартIар тестикьарнава. И программадик экечIзавайбурун проектар ахтармишун патал комиссия тешкилнава.
Къейд ийин хьи, проектар ачух гьалара хкяна кIанда. Иштиракчийриз документар туькIуьриз ва маса месэлайрин гъавурдани тваз куьмек гун лазим я. Чпин проектар конкурсда иштиракун патал ихтияр авай ксарихъ галаз комиссияди суьгьбетда ва тайин къарарни акъудда», — лагьана Абдулмуслим Абдулмуслимова.
Совещанидал малумарайвал, мал-къара хуьдай, якIун ва некIедин суьрсет арадал гъидай проектар уьмуьрдиз кечирмишун патал «Агромотиватор» грантдин пулунин кьадар 3 миллиондилай тIимил ва 7 миллион манатдилай гзаф хьун лазим туш. Хуьруьн майишатдин маса терефрин агробизнесдал машгъул жезвайбуруз 5 миллион манатдин грантар гуда. Чир хьун лазим я хьи, хуьруьн майишатдин бизнесдал машгъул жезвай касди вичин проект кьилиз акъудун патал 10 процентдин кьадарда аваз хсуси такьатарни чара авун герек къведа.
Грантдин такьатрихъ мал-къара, къушар, къелемар, техника маса къачуз, производстводин ва маса дараматар ремонт ийидай, эцигдай, объектар инженерный сетрихъ галаз галкIурдай мумкинвал жеда.
РД-дин хуьруьн майишатдин ва суьрсетдин министр Шамил Рамазанова хабар гайивал, алай вахтунда государстводин куьмек гудай сад авунвай порталда «Агромотиватор» грант къачун патал арзаяр кьабулун давам жезва. Абур 2025-йисан 27-ноябрдалди кьабулда. Идалай гуьгъуьниз комиссиядин заседание жеда ва ада документар грант тайинардай шартIариз, истемишунриз жаваб гузвайбур яни, тушни ахтармишда. Комиссияди йисан эхирдалди конкурсда гъалиб хьайи проектрин сагьибар тайинарда.
Совещанидин сергьятра аваз, СВО-дин иштиракчийриз ва абурун хизанриз яшайишдин икьрардин бинедаллаз хуьруьн майишатдин хиле проектар уьмуьрдиз кечирмишун патал гузвай куьмекриз талукь месэлани веревирдна.
2025-йисуз СВО-дин иштиракчийрихъ ва абурун хизанрихъ галаз хсуси куьмекчи майишат кьиле тухун патал яшайишдин 152 икьрар кутIунна. Абурукай 27 икьрар — СВО-дин иштиракчийрихъ ва 125 — абурун хизанрихъ галаз. Санлай къачурла, гъилевай йисуз дяведин махсус серенжемдин иштиракчийрихъ ва абурун хизанрихъ галаз яшайишдин 414 икьрар (62,3 миллион манатдин къимет авай) кутIуннава.
И важиблу месэладиз талукь яз чпин фикирар вице-премьер Нариман Абдулмуталибова, РД-дин хуьруьн майишатдин ва суьрсетдин министр Шамил Рамазанова, экономикадин ва мулкар вилик тухунин министр Гьажи Султанова, РД-дин Халкьдин Собранидин СВО-дин ветеранрин ва иштиракчийрин крарин рекьяй комитетдин председатель Абдула Мегьамедова, РД-дин зегьметдин ва яшайишдин рекьяй вилик финин министрдин заместитель Абдулкерим Абдулаева ва «СВО-дин ветеранриз ва иштиракчийриз куьмек гунин центрадин» регьбер Мухудин Мегьамедова лагьана.
РикIел хкиз кIанзава хьи, Дагъустанда военнийриз ва абурун хизанриз государстводин патай куьмек гузвай 26 серенжем кардик ква.
Хийир Эмиров
