Дагъустанда алай йисан эхирралди саки 1800-дав агакьна мектебар «Wi-Fi»-далди (махсус технологийрин куьмекдалди арадал гъизвай интернетдин алакъа) таъминарда. Идакай РД-дин рекъемрин рекьяй вилик финин министр, «Цифровая Россия» проектдин Дагъустанда авай координатор Юрий Гьамзатова хабар гана.
Министрдин гафаралди, 2025-йисан эхирралди республикада авай мектебрин 95 процент тамамвилелди «Wi-Fi»-далди таъминарна акьалтIардайвал я.
«Алай вахтунда тахминан 1450 мектебда эцигунринни монтажрин кIвалахар куьтягьнава, техникадин рекьяй интернетдихъ галаз алакъалу серенжемар кьиле тухузва. Йисан эхирдалди Дагъустанда авай мектебрин 95 процент «Wi-Fi»-далди таъминардайвал я. Лагьана кIанда, и программа 2027-йисалди давам жеда. И карди республикада идалай кьулухъ мад кьве йисуз эцигдай цIийи мектебрани гьукуматдин бюджетдин такьатрихъ «Wi-Fi» кардик кутадай мумкинвал гуда», — лагьана Ю.Гьамзатова.
Къейд ийин хьи, 2026-йисуз Дагъустандин мектебра кIвалахзавай муаллимриз 10,5 агъзурдав агакьна планшетар маса къачудайвал я. Абурукай муаллимри тарсара ва электронный журналар ацIурдайла, менфят къачуда. И макьсадриз пулдин такьатар чара ийизвай программади 2028-йисалди кIвалахда.
Чи мухбир
