Мад пул ахъайзамач
«Чна Украина патал мад пул серфзавач. Гила чаз НАТО-ди яракьар агакьарунай гьакъи гузва», — лагьана США-дин президент Дональд Трампа Лацу кIвале журналистриз. Идакай «РИА Новости» чешмеди хабар гузва.
Ада малумарайвал, Украинада къалмакъал башламишай вахтунда вич США-дин президент тиртIа, «и дяве садрани жедачир», исятда ам президент туширтIа, «и дяве дуьньядин пуд лагьай дяведиз элкъведай».
Москвади РагъакIидай патан уьлквеяр са шумудра тагькимарнай: Украинадиз яракьар ракъуруни гьалар дегишардач ва и гьерекатри анжах къалмакъал яргъал чIугвада.
МИД-дин кьил Сергей Лаврова къейд авурвал, НАТО-ди къалмакъалда Украинадиз неинки военный техника ракъуруналди, гьакIни кадрияр гьазуруналди ачухдаказ иштиракзава.
РикIел хкин хьи, США-ди Украинадиз куьмек гунин цIийи къайдадикай Д. Трампа 14-июлдиз ихтилатнай: Вашингтонди НАТО-дик квай Европадин амадагриз яракьар маса гуда, гьакъидихъ къачур яракьар амадагри Киевдив вахкуда. Ихьтин фикирдин тереф сифтени-сифте Германияди хвена. Гьа са вахтунда Францияди, Италияди, Венгрияди ва Чехияди Лацу кIвали малумарай схемада иштиракуникай кьил къакъудна.
Россиядин Президентдин пресс-секретарь Дмитрий Пескова къейд авурвал, Д.Трампан план бизнес я. Европади лагьайтIа, дяведин женгер яргъалди давамарунин ва Киевдиз кискис гунин макьсаддалди еке пулар харжиз гьазур тирдакай ачухдиз малумарзава.
Чуьнуьхиз кIанзавай
Британиядин кураторрин куьмекдалди Украинадиз Россиядин МиГ-31 истребитель чуьнуьхиз ва пилотар чIалал гъиз кIанзавай. ФСБ-дин малумат «РИА Новости» чешмеди раижнава.
Ихтилат физвай истребитель «Кинжал» ракетаяр алайди я. Украинадин макьсад ам чуьнуьхун ва НАТО-дин са уьлкведин мулкарин кьилел ягъун тир.
Россиядин ФСБ-ди малумарзавайвал, Украинадинни Британиядин разведкайриз гьалар къизгъинарунин макьсаддалди акъудиз кIан хьайи фенд, кьабулай серенжемар себеб яз, чIур хьана. Къейдзавайвал, Украинадин оборонадин министерстводин разведкадин кьилин управлениди Россиядин летчикар чIалал гъунин алахъунар авуна; кьилди къачуртIа, абуруз пуд миллион доллар гун хиве кьуна. Киевди лагьайтIа, летчикрикай садаз рагъакIидай патан са уьлкведин ватандашвал хиве кьуна. Мидяйрин разведкадиз МиГ-31 Румыниядин Констанцада авай НАТО-дин базадал рекье тваз кIанзавай. Ана лагьайтIа, ам ПВО-дин такьатри ядай ва и кьуьруькдалди гьалар къизгъин жедай, Россиядик квачир тахсирар кутадай.
Кьил къакъудзава
«Financial Times» газетди кхьизвайвал, Украина кьушунрин кьадар тIимил хьунин, дезертирвилин четин месэлайрал ацалтнава. Къейдзавайвал, фронтдин бязи чкайра аскерар саки авач. Инсанар бес тежезвайвиляй фронтдин линийрал къаравулвалдайбурун кьадар къвердавай тIимил жезва. Дяведин къуллугъдилай катзавайбурун, армиядин жергейриз эверуникай кьил къакъудзавайбурун кьадарни артух хьанва.
«Мукьвара мобилизациядик акатай аскеррикай гзафбур гьеле чпин частарив агакьдалди катнава», — кхьизва чешмеди.
Гьелелиг малум туш
Япониядин JAI авиакомпанияди малумарнавайвал, Россиядихъ галаз ачух рейсер гуьнгуьна хтун патал чарасуз тир шартIар тешкилун герек я. Идакай «РИА Новости» чешмеди хабар гузва.
Авиакомпанияди Россиядин туристри Япониядиз еке итиж ийизвайдакай лагьана.
ЦIийи девир
Сириядин президент Агьмед аш-Шараади вичин уьлкве США-дин геополитический амадаг я лагьана. Адан гафар «Fox News» чешмеда чапнава.
И йикъара США-дин президент Д. Трампа Сириядин регьбердихъ галаз рахунар кьиле тухвана.
«Чун Сириядин гележегдиз инвестицияр жебл авунин мумкинвилерикай рахана. ГьакIни малумарна хьи, Сирия мад хатасузвал авай чка яз амач», — лагьана Сириядин президентди. Адан гафаралди, Сирияди США-дихъ галаз еримлу хьунин цIийи стратегиядин девирдиз кам къачунва. Идалай вилик США-ди Сириядиз талукь санкцияр са кьадар кьезиларнай.
Гьазурайди — К. Ферзалиев
