Ватандин итижар хуьн патал дяведин махсус серенжемда иштиракзавай­ дагъустанвийри чпин вилик эцигзавай муракаб ва кьетIен тапшуругъар­ викIегьвилелди кьилиз акъудзава. Абурун игитвилер Россиядин Федерациядин Президентди ва Гьукуматдини лайихлувилелди къейдзава.

Ингье мадни шад хабар агакьнава. Дербент райондин Агъа Жалгъан хуьряй тир подполковник Хантемир СултановаЗ ва Мамедкъала поселокдай тир полковник Курабег  Караеваз Россиядин­ Федерациядин Игит лагьай тIвар ганва. Идан гьакъиндай РД-дин Кьил Сергей Меликован телеграм-каналда разивилин баянар ава.

«Чи ватанэгьли Хантемир Султанов­ гьуьлуьн пияда кьушунрин 40-бригада­дин штурмовикрин дестедин командир я. И бригадада Табасаран райондай тир Россиядин Игит Руслан Къурбановани­ къуллугъзава. Уьлкведин жуьреба-жуь­ре регионра авай частара чпин буржи та­мамарзаватIани, абурукай виринра хъсандиз рахазва. Чи ватанэгьлийри чеб гьар са патахъай лайихлувилелди къалурунал за дамахзава.

Хантемир Султанова, вичин подразде­ленида къуллугъзавайбуруз дуьздаказ регьбервал гуналди, аскерар хаталувиликай къутармишзава. Вилик эцигзавай везифаяр лайихлувилелди кьилиз акъудзава. Адан дестеди Донецкдин Республика­дик акатзавай хейлин хуьрер азад авунин карда иштиракна. Гьатта вичел залан хер хьайилани, ам жергедай экъечIнач. Гьа идалди ада дагъустанвидиз талукь жуьрэт­лувал, викIегьвал, дурумлувал къалурна.

Заз Камчаткадин крайдин губернатор Владимир Солодоваз сагърай лугьуз кIанзава. Ада чи ватанэгьлидин лайихлувилериз хъсан къимет гана ва, вич Верховный главнокомандующийдихъ галаз гуьруьшмиш хьайила, Хантемир Султанов Игитвилин тIвар гуниз лайихлу тирдакай лагьана. Ида мад сеферда успатзава хьи, Россиядин кьилин къуват чи садвиле ава.

Чи 17 лагьай Игит полковник Куьребег Караев я. 2011-йисалай Россиядин армияда къуллугъзавай офицерди дяведин махсус серенжемдив эгечIай сифте йикъалай ана иштиракзава. Адан викIегьвилерихъ кьадар авач. «Жуьрэтлувиляй» кьве ордендиз, «Дирибашвиляй» медалдиз ва тIвар кхьенвай яракьдиз лайихлу хьанвай полковник пешекарвилин рекьяй еке дережа авай офицер я. Мотострелковый бригададин командирдиз, адан алакьунар фикирда кьуна, са куьруь вахтунда подполковниквилин, ахпа полковниквилин чинар гана. Адан регьбервилик кваз штурмовикри гьар сеферда гъалибвилер къазанмишзава, хуьрер миллетбазрикай азадзава.

Заз къе Султанован ва Караеван ди­де-бубайриз — Заман Абдулаевичазни Хунчиназ Ибрагьимовнадиз, Абдула Куьребеговичазни  Лейла Гьажимурадовнадиз — ватан патал чан эцигзавай лайихлу­ рухваяр тербияламишунай сагърай лугьуз кIанзава. Дагъустанвийри ихьтин рух­вайрал дамахзава».

Абад Азадов