КIвалахдик квачир, къазанжи яшамиш­ хьунин агъа кIанин кьадардилай тIимил тир пенсионерриз пенсиядин кьадар яша­­миш хьунин агъа кIанин кьадардив агакьдалди артухар хъувун талукь я.

Пенсияда авай агьалидин 80 йис тамам хьайидалай кьулухъ адан пенсиядин  фиксированный пай кьве сеферда артухарзава.

Нафакьадал алай ксариз килигна (вини кьил 3 касдиз), гьар садай вацра 2969 манат пул алава ийизва.

Маса кьезилвилерик акатзава:

 70 йисалай виниз яшара авай, кIва­чихъ кIвал галайбуруз капитальный ремонтдай эвездин такьатар (79 йис тамам жедалди — 50 %, 80 йис хьайидалай кьулухъ — тамамдиз);

 эгер ЖКУ-дин харжийриз хизандин къазанжидин 22 процентдилай гзаф акъат­за­ватIа, субсидия талукь я;

 пенсияда авай ватандашар 6 сотых чилин налогдикай азад ийизва;

 са объектдин эменнидин налогдикай азад ийизва;

 дарманар 50 процентдин кьезил къиметдай ва я гьавая къачудай мумкин­вал (тайин­ малуматар 1994-йисан 30-июл­диз акъудай 890-нумрадин ­Гьукуматдин къарардай жа­­гъида);

 сагъарунин рекье кьезилвилер, сарарин протез гьавая туькIуьрун;

 кIвалахзавай пенсионердиз алава отпуск къачудай ихтияр хьун.

Ялгъузбуруз талукь яз

Итим галачиз аялар хуьзвай дидейриз­ гьукуматди гузвай са жерге куьмекар талукь я. Кьилди къачуртIа, 17 йис тамам же­далди аялдиз сад тир пособие гузва. Та­кьатар ихьтин шартIаралди тайинар­за­ва: 

 хизанда авай гьар са касдал регионда тайинарнавай яшамиш хьунин агъа кIанин кьадардин такьатрилай артух гьалтзавачтIа;

 хизандин эменни тайинарнавай кьадаррилай артух хьун лазим туш (месела, кьве машин ва я са шумуд дача аваз хьуникди тIвар кьунвай такьатар къачуз тахьун мумкин я);

 аялдин диде Россиядин ватандаш яз хьана кIанзава.

Къейднавай такьатрин кьадар, хизандин игьтияждин дережадилай аслу яз, рес­публикада тестикьарнавай яшамиш хьунин агъа кIанин кьадардин 50, 70 ва я 100 процент тайинарда.

ГьакIни ялгъузбуруз аялдин йисни зур тамам жедалди адахъ гелкъуьнай гузвай такьатар талукь я. Пособидин кьадар мажибдин 40 процент хьун мумкин я. И такьатар къачун патал аялдихъ гелкъвезвай иеси кIвалахдик кваз хьун чарасуз я.

Къейднавайбурулай гъейри, ялгъузбуруз региондин бязи маса кьезилвилерни талукь я. И кьезилвилерик гзаф аялар авай хизанриз талукь тIимил процентдай ипотекадин куьмекни акатзава.

Маса жуьредин кьезилвилерикни алава серенжемар акатзава:

 аялдин 14 йис тамам жедалди­ (эгер аял инвалид ятIа, — 18 йис тамам­ жедалди) адахъ гелкъвезвайди кIва­лах­дилай алудуникай хуьн;

 кIвалахдин югъ тамамсузди авунин ихтиярар, йифен сменайрикай ва командировкайрикай кьил къакъуддай ихтияр хьун;

 такьатарни гана, алава отпуск ва мажиб галачир кьве гьафтедин отпуск къачудай ихтиярар аваз хьун.

И ва маса месэладин патахъай галай-галайвал малуматар МФЦ-дин идарадин пешекарривай чириз жеда.

«Лезги газет»