ЦIийи кьадарар тестикьарнава

Дагъустанда 2026-йиc патал агьалийриз яшамиш хьун патал чарасуз герек такьатрин агъа кIанин кьадар гьикьван ятIа тайинарнава. Идакай РД-дин зегьметдин ва яшайишдин рекьяй вилик финин ми­нис­терстводин сайтда раижзава.

ИкI, чешмеди къейдзавайвал, РД-дин Гьукуматди ПМ-дин (прожиточный мини­мум)­ цIийи рекъемар тестикьарнава. Яша­йишдин выплатайрин гьахъ-гьисабар патал абур 2026-йисан 1-январдилай къуватда гьатда.

ЦIийи ПМ-дин рекъемар ихьтинбур я:

— зегьметдиз къабил агьалияр патал — 18 агъзурни 785 манат;

— пенсионерар патал — 14 агъзурни 821 манат.

— аялар патал — 16 агъзурни 717 манат;

Кьилдин гьар са агьали патал юкьван гьисабдалди (на душу населения) — 17 агъзурни 234 манат.

Гекъигун патал: 2025-йисуз яшамиш хьун патал чарасуз герек такьатрин агъа кIанин кьадардиз талукь рекъемар ибур я:

— зегьметдиз къабил агьалияр патал — 15 агъзурни 328 манатдилай 17 агъзурни 589 манатдал кьван;

— пенсионерар патал — 13 агъзурни 878 манат;

— аялар патал — 15 агъзурни 653 манат.

Кьилдин гьар са агьали патал (на душу населения) — 16 агъзурни 137 манат.

Виликдай чна, «Интерфакс» изданидал асаслу яз, хабар гайивал, яшамиш хьун патал чарасуз герек такьатрин агъа кIанин кьадар агьалийрин игьтияжрин гьахъ-гьисаб акъуддайла фикирда кьазва. Идалайни алава яз, адалай яшайишдин выплатайрин кьадарни аслу я. ПМ хкажунихъ галаз сад хьиз, аялар галай, агьвал хъсан тушир хизанриз гузвай выплатайрин, са жерге хилерай яшайишдин икьраррин, гьакIни федеральный ва региональный дережада пенсийрал алава хъийизвай пулдин такьатрин кьадарни артух жезва.

КIвалахар акьалтIзава

Дагъустанда «Уьмуьр патал инфраструктура» милли проектдин сергьятра аваз кьиле тухузвай рекьер ремонт авунин серенжем акьалтIзава. Идакай РД-дин транспортдин ва рекьерин майишатдин министерстводин телеграм-каналди раижзава.

Чешмеди къейдзавайвал, 2025-йисан пуд лагьай кварталдин нетижайралди, Дагъустанда кIвалахар 24 объектдал акьалтIарнава, абурукай 2 ишлемишиз вахканва.

2025-йисан 1-октябрдин делилралди, милли проектдин сергьятра аваз акьал­тIарнава:

— автомобилрин рекьерин 1 035,74 агъ­зур кв. метр винелпад къирдинни бетондин (асфальтобетонный) къаришмадалди кIевун;

— 140,486 километрда, РД-дин региональный сетдин сергьятра аваз, умумидаказ ишлемишдай автомобилрин рекьерал кьиле тухузвай кIвалахар.

РикIел хкин, виликдай, «Дагъустандин­ экономика» телеграм-каналдал асаслу яз, кхьейвал, Дагъустанди 2026-йисуз рекьер ремонт авун ва хуьн патал гзаф такьатар харжда.

Дагъустандин финансрин министерстводин делилралди, алукьдай йисуз рекьерин фондунин кьадар 24,6 миллиард манатдикай ибарат жеда. 2025-йисуз и рекъем 19,7 миллиард манатдиз барабар тир.

ХъуьтIуьз гьазурвал

Дагъустанда газдин объектар­ хъуь­тIуьз гьазурунин серенжем акьалтI­нава. Идакай «Дагъустан патал газ» телеграм-каналди хабар гузва.

Чешмеди «Газпром газораспределение Дагестан» ва «Газпром газораспределение Махачкала» компанийрин генеральный директор Ризван Мурадован гафарал асаслу яз, раижзавайвал, ремонтдин серенжемрин сергьятра аваз, газдин компанийри 80 километрдилай гзаф сетар ахтармишнава.

Идалайни алава яз, газ чара ийидай ва адал гуьзчивал тухудай (газораспределительный) 250 шкафда тадаракар ремонтнава, саки 3 агъзур цIийи даяхар эцигнава, тахминан газдин 15 агъзур арматурайриз техникадин жигьетдай къуллугъунин мярекатар кьиле тухванва.

Ризван Мурадова къейдзавайвал, алай йисуз кIвалахар ва абур пулдин такьатралди таъминарун, 2024-йисан ре­къем­рив гекъигайла, 26 процентдин артухарнава.

Махачкъалада 40 агъзур агьали газдалди таъминарунин кIвалах хъсанарнава. «Газпром газораспределение Махачкала» компаниядин пешекарри 2025-йисуз Дагъустандин меркезда аварийный­ гьалда авай газдин линияр цIийикIа туь­кIуьр хъувунва.

Гьазурайди — Муса  Агьмедов