РФ-дин просвещенидин министерстводи ва Рос­­обрнадзорди 2026-йисуз ОГЭ-дин ва ГВЭ-дин (государственный выпускной экзамен) сад тир расписание тестикьарунин гьакъин­дай проектар чапна. 31-октябрдалди документ жемиятди веревирд авун патал ачухдиз тада. Идалай вилик йисарин тежрибадай аквазвайвал, тес­тикьарнавай расписание теклифнавайдалай са тIимил кьван дегиш хьун мумкин я, амма имти­гьанар тухунин умуми вахт, аквар гьаларай,  про­ектда къалурнавайди яз  амукьда.

 2026-йисан ОГЭ-дин асул вахт

КIуьд лагьай класс акьалтIарзавай выпускникар патал государстводин асул имтигьан (ОГЭ) вахкудай вахт 2026-йисуз пуд паюниз пайнава: вахтунилай фад, асул ва алава. Гьар паюна резервдин йикъарни фикирда кьунва. Вири имтигьанар чкадин вахтуналди  сятдин 10-даз башламишда.

ЧIехи пай выпускникри ОГЭ асул вахтунда — 2-июндилай 19-июндал кьван йикъара вахкудайвал я. Кьилди къачуртIа:

.  2-июндиз — математика;

.  5-июндиз — выпускникди хушуналди хкянавай вири тарсарай (яни урус чIал ва математика квачиз);

.  6-июндиз — къецепатан уьлквейрин чIалар (ин­гилис, испан, немс, френг), информатика;

.   9-июндиз — урус чIал;

.  16-июндиз, 19-июндиз — хкянавай вири тарсар.

ОГЭ-дин асул вахтунин резервдин йикъар 29-июнь (математика), 2-июль (урус чIал), гьакIни 3 ва 6-июль (хкянавай вири тарсарай) я.

Имтигьан и  йикъара вахкун патал арза кхьиз жеда, эгер  кьабулиз жедай себеб аваз,  адавай асул юкъуз ОГЭ-да иштиракиз хьаначтIа (я тахьайтIа, тешкилатчияр тахсирлу яз, имтигьандин нетижаяр кваз кьуначтIа). Идалайни гъейри, резервдин юкъуз ОГЭ цIийи кьилелай вахкуз жеда, эгер сифте сеферда са ва я кьве имтигьан «2» къиметдалди вахканватIа (амма ихьтин дуьшуьшда  вахкуз тахьанвай имтигьанрин арада чарасузбур тир кьве тарс хьана кIандач — урус чIалайни, математикадай «2» къимет атанвайбуруз имтигьан цIийи кьилелай анжах са йисалай вахкудай ихтияр ава).

2026-йисан ОГЭ-дин вахтунилай фад тир йи­къар гьибур я?

Выпускникдин хушуналди ОГЭ вахтунилай фад вахкуз жеда. ИкI, алукьзавай йисуз вахтунилай­ фад имтигьан вахкудай асул йикъар агъадихъ галайбур я:

.  21 апрелдиз — математика;

.  24 апрелдиз — урус чIал;

.  28 апрелдиз — информатика, литература, обществознание, химия;

.  6 майдиз — биология, география, къецепатан уьлквейрин чIалар, тарих, физика.

Вахтунилай фад вахкудай ОГ-дизни резервдин йикъар жеда:

.  12 май — математика;

. 13 май — информатика, литература, общест­вознание, химия;

.  14 май — биология, география, къецепатан уьл­квейрин чIалар, тарих,  физика;

.  15 май — урус чIал;

.  18 май — вири тарсар.

2026-йисан ОГЭ-дин алава вахт мус пландик кутунва?

Алава йикъара ОГЭ вахкузва, низ асул вахтунин имтигьанрин кьведалай гзаф тарсарай «2» къиметар атанатIа (я тахьайтIа, вахтунда ихтияр къачуз агакь тавун себеб яз, имтигьанар гатуз вахкуз агакьначтIа), гьакIни  а ксари нин имтигьанрин  нетижаяр абур чеб тахсирлу яз кьабулначтIа.

2026-йисуз ОГЭ-дин алава вахт:

.  3 сентябрдиз — математика;

.  7 сентябрдиз — урус чIал;

.  10 сентябрдиз — биология, география, тарих, физика;

.  14 сентябрдиз — къецепатан уьлквейрин чIа­лар, информатика, литература, обществознание, химия.

Алава вахтуна резервдин вад югъ чара авунва — 21 сентябрь (урус чIал), 22-сентябрь (математика), 23 ва 24-сентябрь (хушуналди хкянавай тарсар), 25-сентябрь (вири рекьерай тарсар).

Къейд ийин, алай йисуз 9-классрин выпускникри­ эхиримжи (тарсар гайи вири рекьерай) ГИЭ (государственный итоговый экзамен) 23-сентябрдиз вахкана. РД-дин образованидин ва илимдин минис­терстводи хабар гузвайвал, санлай къачурла, имтигьанра 514 касди иштиракна: 10-урус чIалай, 11 — математикадай, 7 — тарихдай, 5-биологиядай, 82 — географиядай, 4 — литературадай, 53 — информатикадай, 3-химиядай, 1 — химиядай ва 338 — обществознанидай.

ГьакIни 23-сентябрдиз республикада 11-класс­рин выпускникар патал урус чIалай ва асул математикадай ЕГЭ кьиле  фена.  Дагъустанда и имтигьанда иштиракун патал 156 арза атана: урус чIалай — 6,  математикадай — 96 касдилай. РикIел хкин, юкьван умуми  образованидин аттестат гун и тарсар хъсан къиметар аваз вахкунилай аслу я.

Саида  Мурадова