Техуниверситетдин студентни гележегдин духтур ва инженер куь тупламишда? Малум хьайивал, вузра чирвилер къачудай сад хьтин тарсари. Гила Россиядин вири университетра, высший образованидин цIийи системадин сергьятра аваз, гьар са хилез талукь тарсарилай гъейри, ругуд дисциплинадикай ибарат тир чарасуздаказ гана кIанзавай тарсарин сиягь кардик кутада. Идакай РФ-дин высший образованидин ва илимдин министерстводи хабар гузва.
ИкI, уьлкведин вири вузра ругуд тарсуникай ибарат «социогуманитарное ядро» пайда жеда. И сиягьдик акатзава: тарих, философиядин бинеяр, урус чIал, Россиядин государственностдин бинеяр, инсандин яшайишдин кIвалахрин хатасузвал (БЖД), физкультура.
Министерстводи гъавурда твазвайвал, и тарсар вири университетар патал сад тир программайрай, тайин кьадар сятерин сергьятра аваз, гуда ва чирвилерин дережани вирибур патал сад хьтин материалрай ахтармишда. Яни, и тарсарив эгечIзавай тегьер уьлкведин вири мулкунал сад хьтинди жеда.
Квез герек я и кар? Образованидин ери виринра сад хьтинди авун ва вири студентрихъ бинелу асул чирвилер хьун патал. Идаради гьисабзавайвал, ида «академический мобильность» хкаждай мумкинвал гуда: студентдивай, образованидин фундамент квадар тавуна, мус хьайитIани, са вуздай масадаз экъечIиз жеда.
«Социогуманитарный дибдик акатзавай дисциплинайрай тарсар вузда кIелунин сифтегьан кьве йисуз гуда. Идалай кьулухъ студентдивай я вичи хкянавай рекьяй кIелун давамариз, я маса рекьяй маса университетдик экечIиз жеда», — гъавурда твазва министерстводи. ИкI, шегьердилай ва я вуздин дережадилай аслу тушиз, студентдиз сад хьтин чирвилерин диб жеда.
Студентар патал вуч дегиш жеда? Эгер идалай вилик вузди программадик гуманитарный гьихьтин тарсар кутадатIа вичи гьялзавайтIа, гила ихьтин мумкинвал амукьдач. И рекье вири кIевивилелди тестикьарнава: темайрин сиягьдилай башламишна, къиметар ядай къайдадал агакьдалди. Студентар патал хъсанвал яз гьисабзава: программа танишди хьун (гьатта ам регионда авай са акьван машгьурди тушир вуздик экечIайтIани); зачетар квадар тавуна, са вуз масадалди эвезунин мумкинвал; гуманитарный ва пешекарвилин гьазурвал (яни студент гьар жуьре патарихъай гъавурда авайди жезва).
Малум тирвал, высший образованидин социогуманитарный дибдин цIийи къайдадал гегьенш майданра 2027-йисуз элячIун пландик кутунва. 2023-йисалай ихьтин къайдадин ахтармишдай проект уьлкведин ругуд университетда уьмуьрдиз кечирмишзава.
Жасмина Саидова
